«Համախմբում» շարժման անդամ, հասարակական-քաղաքական գործիչ Ավետիք Չալաբյանը կշարունակի մնալ կալանավորված:
Aravot.am-ի հետ զրույցում Ավետիք Չալաբյանի պաշտպան Վարազդատ Հարությունյանը հայտնեց՝ ՀՀ վերաքննիչ քրեական դատարանը (նախագահող դատավոր Արմեն Դանիելյան) մայիսի 31-ին կայացած դատական նիստի ընթացքում մերժեց Ավետիք Չալաբյանի կալանավորման դեմ վերաքննիչ բողոքը:
Հիշեցնենք՝ ՀՀ Վերաքննիչ քրեական դատարանում դատավոր Արմեն Դանիելյանի նախագահությամբ մայիսի 30-ից ընթանում է Ավետիք Չալաբյանի կալանավորման դեմ պաշտպանների բողոքի քննությունը: Ավետիք Չալաբյանը կալանավորված է մայիսի 14-ից: Նա մեղադրվում է ՀՀ քրեական օրենսգրքի 163-րդ հոդվածի 3-րդ մասի 2-րդ կետով՝ մարդկանց դրդելու հավաքների, ցույցերի՝ նյութական շահագրգռվածության միջոցով:
Վարազդատ Հարությունյան
Վարազդատ Հարությունյանին հարցրինք՝ դատավորի որոշումը սպասելի՞ էր իրենց համար, թե՞ հույսեր կային, նա պատասխանեց. «Դանիելյան Արմենի պարագայում, մեր իրողություններով ո՞նց կարելի է ունենալ ռեալ ակնկալիք արդարադատություն ստանալու հետ կապված»:
Կարդացեք նաև
Հստակեցմանը՝ այսինքն՝ քաղաքական պատվե՞ր է իրականացվում, փաստաբանը պատասխանեց. «Բա ինչ է արվում: Ափսոս նիստը փակ էր, եթե հանրությունը տեսներ նիստի ընթացքը, կհասկանար, թե ինչի մասին է խոսքը: Օրենքով, իհարկե, նիստը չէր կարող բաց լինել, բայց որ բաց լիներ, ավելի առարկայական հանրությունը կհասկանար, թե մեր ասածն ինչ է»:
Հետաքրքրվեցինք՝ ի՞նչ քայլերի են դիմելու, Վարազդատ Հարությունյանը պատասխանեց՝ լրացուցիչ կտեղեկացնեն:
Տաթև ՀԱՐՈՒԹՅՈՒՆՅԱՆ
