Այսօր անդրադառնալով Դիմադրության շարժման անհնազանդության գործողությունների ժամանակ ոստիկանության կիրառած բիրտ ուժի դեպքերին՝ փոխոստիկանապետ Վարդան Մովսիսյանն ԱԺ-ում լրագրողների հետ զրույցում ասաց, որ ոստիկանությունում մոտ 80 ծառայողական քննություն է սկսվել ու բոլոր դեպքերն ուսումնասիրվում են. «Բիրտ ուժը, գիտեք, դե, բերման են ենթարկում, եթե գնում է ոստիկանին չենթարկվելու, մենք կիրառում ենք….դուք եք համարում բիրտ ուժ: Տեղում ոստիկանները կողմնորոշվում են»:
Երբ լրագրողները փոխանցեցին անչափահասի նկատմամբ բռնության դեպքը՝ փոխոստիկանապետը արձագանքեց. «Ներողություն եմ խնդրում իհարկե, բայց անչափահասն ի՞նչ գործ ուներ այդտեղ: Այդ երիտասարդ անչափահասին գիտեմ, որ տեղափոխել են հիվանդանոց, այնտեղ ոչ մի լուրջ բան չի եղել, անձամբ ես եմ հետաքրքրվել, եղել է 1-ին համալսարանական կլինիկական հիվանդանոցում: Ցույց են տվել զուտ առաջին օգնություն, ոչ մի կոտրվածք, ոչ մի բան»:
Նա նաեւ տեղեկացրեց, որ ոստիկաններից մեկի մոտ է եղել կողերի կոտրվածք: Վարդան Մովսիսյանը վստահեցրեց, որ իրենք հատուկ հանձնարարական չեն ստացել՝ բիրտ ուժ կիրառելու ցուցարարների նկատմամբ, ինչպես պնդում են ընդդիմադիրները. «Եթե գնում է հասարակական կարգի կոպիտ խախտում, ոստիկաններն այդ ժամանակ նոր ուժ են կիրառում»:
ԱԺ-ում 2021-ի բյուջեի կատարողականի նախնական քննարկումների ժամանակ ՔՊ պատգամավոր Արմեն Խաչատրյանն ասաց. «ՀԿ-ների տվյալներով՝ 2500 տելեգրամյան հայկական ալիքներ կան, որոնք իրականացնում են թմրամիջոցների իրացում: Ինչքան էլ ոստիկանությունը լավ աշխատի, եթե մասնագիտական համալրվածություն չունենա, լուրջ արդյունքի չենք հասնի: Կիբեռոլորտի մասնագետները բավականին բարձր վարձատրվող մասնագետներ են ու խնդիր կա՝ արդյոք կուզե՞ն ոստիկանությունում աշխատել, թե՞ ոչ»:
Կարդացեք նաև
Փոխոստիկանապետ Վարդան Մովսիսյանը պատասխանեց, որ մեծ կարեւորություն են տալիս այդ աշխատանքներին, իրենց մշտական ուշադրության ներքո է:
Արմեն Խաչատրյանը նաեւ փոխանցեց մարդկանց դժգոհությունը՝ անձնագրերի հետ կապված. «Ամեն տարի անձնագրերի, վարորդական իրավունքների պլաստիկ քարտերի, տեխանձնագրերի հետ կապված խնդիրներ են առաջանում: Ժամանակին կոմունիկացիոն խնդիրները չեն լուծվել»:
Փոխոստիկանապետը պատասխանեց, որ Ուկրաինայի պատերազմը մեծ դժվարություն ստեղծեց լոգիստիկայի տեսակետից: Նա ասաց, որ կաշխատեն, որ բնակչությունը նեղություն չքաշի ու հարցերը նախապես լուծեն:
Հռիփսիմե ՋԵԲԵՋՅԱՆ
