Լրահոս
Օրվա լրահոսը

«Որեւէ մեկը որեւէ բան չի հանձնել»․ Ալեն Սիմոնյանը՝ Արցախը հանձնելու եւ ընդդիմության պահանջի մասին

Մայիս 31,2022 11:49

«Ես նման հայտարարություններ անելու իրավունք չունեմ, որովհետեւ հիմա բանակցային գործընթաց է, ու դրա ժամանակ նման հայտարարություն անել՝ նշանակում է ինչ-որ փաստի առաջ կանգնեցնել բանակցողին եւ գործընթացը։ ԱԺ նախագահի մակարդակով նման հայտարարություն անելն անընդունելի է»,-խորհրդարանում լրագրողների հետ ճեպազրույցում այսօր հայտարարեց ԱԺ նախագահ Ալեն Սիմոնյանը՝ անդրադառնալով հարցին, թե կարո՞ղ է պատասխանել Նիկոլ Փաշինյանի հրաժարականի պահանջով հանդես եկող դիմադրության շարժման հարցապնդմանը, որ Արցախը երբեք չի կարող լինել Ադրբեջանի կազմում։

«Ընդդիմությունը նման հարցադրումներ անելու հնարավորություն ունի՝ առանց շոուներ կազմակերպելու, այս դահլիճում, կառավարության հետ հարցուպատասխանի ժամանակ։ Կամ գրավոր դիմել։ Նման գործողություններով փորձում են գործընթացի իմիտացիա անեն»,-համոզմունք հայտնեց Ալեն Սիմոնյանը։

-Իրենք ասում են, որ փողոցային պայքարի են դուրս եկել։

-Բա ինչի՞ մանդատները վայր չեն դնում, որ դուրս են եկել փողոց։

-Մանդատներն ԱԺ-ում պետք են գալու։

-Բա ինչի՞ չեն գալիս գործի։ Ասում են, թե վարչապետը եւ իշխանությունը լեգիտիմությունը կորցրել են, բայց ակնհայտ է, որ իրենք ունեն լեգիտիմության խնդիր, որովհետեւ իրենց ձայն տվածների 21%-ից երկու տոկոսն անգամ դուրս չի գալիս փողոց։ Սա վերածվել է մարդկանց նյարդայնացնելու, խցանումներ ստեղծելու մանիայի։ Ակնհայտ է, որ իրենք ծանր կացության մեջ են, որովհետեւ, կներեք արտահայտության համար, բայց մնացել են իրենց «պրիոմի» տակ»։

-Իշխանությունն օգնելո՞ւ է նրանց դուրս գալ այդ վիճակից։

-Չեմ կարծում։ Մենք թույլ ենք տալու, որ իրենք մինչեւ վերջ մաշեցնեն իրենց հնարավորությունները։ Առիթից օգտվելով՝ ուզում եմ ժողովրդից ներողություն խնդրել, որ իրենք ստիպված են այս խցանումների ականատեսը լինել։ Մի քիչ դիմացեք, այս ամենը կավարտվի։

-Իսկ չեք ուզո՞ւմ ժողովրդից ներողություն խնդրել ձեր բերածի համար՝ սկսած Արցախի 75%-ի հանձնումից, անվտանգային խնդիրներից, Գորիս-Կապան մայրուղու հանձնումից, պատերազմի զոհերից։ Այդ չարիքների համար ներողություն խնդրելո՞ւ եք։

-Դրա համար ներողություն վաղուց խնդրել ենք, գնացել ենք ընտրությունների ութ ամիս առաջ։ Ժողովուրդը նորից պատվիրակել է մեզ իշխանությունը։ Ամեն անգամ նույն բանը կրկնելով՝ որեւէ բանի չի հասնի ընդդիմությունը եւ դուք նույնպես։ Ներողություն խնդրելու ձեւն ընտրություններն են։ Որեւէ մեկը որեւէ բան չի հանձնել, եկեք այդ երկար բանավեճի մեջ չմտնենք։

Լուիզա ՍՈՒՔԻԱՍՅԱՆ

Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:

Մեկնաբանություններ (0)

Պատասխանել

Օրացույց
Մայիս 2022
Երկ Երե Չոր Հնգ Ուրբ Շաբ Կիր
« Ապր   Հուն »
 1
2345678
9101112131415
16171819202122
23242526272829
3031