ՀԵՎԿ ՀԱՅՏԱՐԱՐՈՒԹՅՈՒՆԸ «ՍԱՍՆԱ ԾՌԵՐԻ» ԿԱԼԱՆԱՎՈՐՄԱՆ ՎԵՐԱԲԵՐՅԱԼ
Ս.թ. մայիսի 28-ին հանրությունը տեղեկացավ ՊՊԾ գնդի 2016 թ. գրավման գործով «Սասնա ծռեր» խմբավորման 7 անդամների կալանավորման մասին։ Ընդհանրապես, թվում է, որ ազգային տոները պետք է լինեն համերաշխության եւ համաներման, այլ ոչ թե հալածանքի եւ բաժանման առիթ: Այս կապակցությամբ, Հայաստանի Եվրոպական կուսակցությունը հանդես է գալիս հետեւյալ հայտարարությամբ.
Ա. Հայաստանի Եվրոպական կուսակցությունը համարում է այսօրվա աշխարհաքաղաքական զարգացումները ռուս-թրքական դարավոր լծից մեր Հայրենիքն ազատագրելու և ապագաղութացնելու պատմական հնարավորություն և ծայրաստիճան պատասխանատու պահ, որտեղ ցանկացած սխալն ու վրիպումը կարող են ճակատագրական լինել:
Բ. Հայաստանի Եվրոպական կուսակցությունը հաստատում է իր հավատարմությունը քաղաքական պայքարի բացառապես սահմանադրական միջոցներին` համոզված լինելով, որ ժողովրդավարության հաղթանակին անհնար է հասնել բռնի եղանակով, որը միայն վերարտադրելու է բռնապետությունը` նոր կարգախոսներով ու դիմակներով: Ուստի դիմում ենք ՀՀ-ում բոլոր գրանցված եւ գործող կուսակցություններին ու խմբավորումներին հորդորով՝ բացառել հակաժողովրդավարական ու հակաիրավական գաղափարներն ու գործողությունները հայկական քաղաքական կյանքից։
Կարդացեք նաև
Գ. Հայաստանի Եվրոպական կուսակցությունը կոչ է անում ՀՀ իշխանություններին անհապաղ անցկացնել դատաիրավական համակարգի արմատական բարեփոխումներ, որոնց առանցքը պետք է լինի արդարադատության մարմինների անկախությունը գործադիր մարմիններից, ինչպես նաեւ դատավարության և քրեակատարողական հիմնարկների արդիականացումը միջազգային չափանիշներով ու մարդասիրության սկզբունքներով:
Դ. Հայաստանի Եվրոպական կուսակցությունը նախկինում դիմել էր իշխանություններին՝ ՊՊԾ գնդի 2016 թ. գրավման գործով «Սասնա ծռեր» խմբավորման անդամ Արմեն Բիլյանի առողջական վիճակի հետ կապված մարդասիրական խնդրանքով, որը ստացավ դրական ընթացք։ Ուստի կրկին դիմում ենք նաեւ խմբավորման այլ անդամների առողջական խնդիրները նկատի առնելու եւ մարդասիրական հնարավոր լուծումներ գտնելու խնդրանքով:
Հայաստանի Եվրոպական կուսակցություն
2022 թ. մայիսի 31
