Այսօր երեկոյան Ֆրանսիայի հրապարակում տեղի ունեցած հանրահավաքում «Հայաստան» խմբակցության պատգամավոր Իշխան Սաղաթելյանն ասաց՝ «Հայաստանում գտնվող դեսպանատները, միջազգային կազմակերպություններն իրենց երկակի ստանդարտներով, իրենց լռությամբ օգնում են, որպեսզի ոստիկանները ուժ կիրառեն շարժման մասնակիցների նկատմամբ»:
Իշխան Սաղաթելյանի խոսքով, սակայն, որեւէ ուժ, միջոց իրենց պայքարը չի կասեցնելու. «Այս պայքարը պահանջում է վճռականություն, զոհաբերություն, կամք, սեղանին դրված է մեր հայրենիքի հարցը: Հետևաբար` որևէ մեկը չի կարող մեր պայքարը կասեցնել: Եթե մտածում են, որ մեկի բիզնեսի հետեւից են գնալու, մեկի՝ ընտանիքի վրա կամ մեկ այլ կերպ ճնշում են գործադրելու, ասեմ, որ նման միջոցներով որեւէ արդյունքի չեն հասնելու»:
Ասաց, որ Նիկոլ Փաշինյանն այսօր ամեն գնով պահում է իր աթոռը, սակայն «Դիմադրության շարժումը» դա թույլ չի տալու. «Նա սպասարկում է թուրքերի շահը, եւ դա արդեն փաստ է»:
Իշխան Սաղաթելյանի խոսքով՝ ի տարբերություն իշխանության ներկայացուցիչների, շարժման մասնակիցները չեն եկել խանութները թալանելու, երկիրը քաոսի տանելու, Երեւանի կենտրոնում արյուն թափելու, եւ դրա ապացույցն այն է, որ այս ընթացքում անգամ մեկ ավտոմեքենայի հայելի չի կոտրվել. «Նիկո՛լ, քեզ պիտի հեռացնենք անարյուն, որքան արյուն թափել ես հերիք է, Երեւանի կենտրոնում այլեւս արյուն չի թափվելու»:
Կարդացեք նաև
Լուսինե ԲՈՒԴԱՂՅԱՆ
