«Ամբողջ տարածաշրջանը զինվում է, ամբողջ աշխարհը զինվում է և ռազմականացվում, բայց կա աշխարհում մի երկիր, որը դա չի անում․ Հայաստանն է։ Սա ֆենոմենալ է»,- Ֆրանսիայի հրապարակում «Հայկական նախագիծ» գիտակրթական ՀԿ-ից կողմից անցկացվող 28-րդ քննարկման ժամանակ հայտարարեց թուրքագետ Վարուժան Գեղամյանը։
Ըստ նրա՝ պարտությունից հետո ճիշտ հակառակը պիտի լիներ։ Անդրադառնալով ՀՀ-ում հասարակական տրամադրություններին և ռեակցիաներին՝ նա նկատեց․ «Մենք ունենք մեր հասարակության բնական ռեակցիայի փոխում դեպի երկրորդային նշանակության օրակարգեր։ Օրինակ՝ հանրությանը անօդաչու սարքեր ղեկավարել են սովորեցնում։ Դա թռցնել սովորեցնելը, ինչպես Կարեն Իգիթյանն է ասում, մի քանի ժամվա ինժեներական խմբակի հարց է։ Մյուս կողմից կարիք չկա, որ բոլոր երեք միլիոնը դրոն թռցնել իմանան։ Նման թեմաներ նետվում են օրակարգ, որ ուշադրություն շեղվի այն հանգամանքից, թե ինչու չի աշխատում համակարգը, որը պիտի ապահովի բոլորի՝ գլուխը կախ գործ անելու էֆեկտը»։
Խոսելով ՀՀ զինծառայողի սպանությանը հաջորդած ՀՀ ԱԳՆ հայտարարության մասին՝ թուրքագետն ասաց․ «Առաջ դա էլ չէին անում, հիմա դա անում են ազգային ուժերի բերանը փակելու համար։ Մի կողմից ունես քո զինվորի սպանությունը, քո տարածքի նվաճում, քանի որ երեք օր առաջ Սյունիքի մարզում մեկ հատված օկուպացվել է Ադրբեջանի կողմից, մյուս կողմից ՀՀ ԱԳՆ-ի հայտարարություն, որը ոչ թե սաստող հայտարարություն է անում, որ այլ նշում է, որ մենք դիմում ենք միջազգային հանրությանը, որ սաստի Ադրբեջանին։ Վերահաստատում ես, որ չես պահելու քո սահմանը, այլ ուրիշ երկրի զորքերը։ Դու ամբողջովին վերացնում ես պաշտպանական գործառույթը։ Երևի ուզում ես քո պատկերացմամբ՝ Երևանում նստել, որ քո փոխարեն քո անվտանգությունը ուրիշ երկրներն ապահովեն՝ կապ չունի՝ դրանք որ ճամբարից են։ ԵԱՀԿ անդամ է Թուրքիան։ Նա էլ կարող է ասել՝ դիմում եք միջազգային հանրությանը, ես էլ եմ միջազգային հանրություն, բերում եմ իմ զորքերը տեղակայում քո տարածքում։ Խոշոր հաշվով հիմա դա էլ անում են»։
Տաթև ՀԱՐՈՒԹՅՈՒՆՅԱՆ
