Ֆրանսիայի հրապարակում ընթացող քննարկումների շրջանակում այսօր շոշափվեց նաեւ «Քաղբանտարկյալները «ժողովրդավարության բաստիոնում». օրենք եւ ամենաթողություն» թեման:
Քննարկումը վարող իրավապաշտպան Ռուբեն Մելիքյանը նշեց, որ ներկայացնելու են, թե ինչպիսի իրավիճակ է «ժողովրդավարության բաստիոնում» եւ դա իրականացնելու են այն փաստաբանների հետ, որոնք կոնկրետ զբաղվում են քաղբանտարկյալների վերաբերյալ գործերով:
«Մենք բոլորս արդեն տեւական ժամանակ է եւ հատկապես վերջին մեկ ամսվա ընթացքում մեր վարույթներում ունենք գործեր, որոնք վերաբերում են կոնկրետ քաղբանտարկյալներին: Այսօր խոսելու ենք փաստերով եւ իրավունքի վրա կոնկրետ աղբյուրների վրա հղում անելով: Մենք քաղբանտարկյալ ձեւակերպումն օգտագործում ենք ոչ թե քաղաքական իմաստով, այլ սա շատ կոնկրետ իրավական բովանդակություն ստացած բովանդակություն է»,- ասաց Ռուբեն Մելիքյանը:
Փաստաբան Բենիկ Գալստյանի խոսքով, իր պաշտպանյալ Գերասիմ Վարդանյանը ԵԽԽՎ թիվ 19.00 բանաձեւի լույսի ներքո առնվազն երեք մասով քաղաքական բանտարկյալ է: «Գերասիմ Վարդանյանը հայրենասեր մարդ է, մասնակցել է արցախյան վերջին երկու պատերազմներին, վերջինի ժամանակ ստացել է վիրավորում: Բոլորը գիտեն նրա քաղաքական ակտիվությունը, որը պայմանավորված է միայն պրոհայկական, պրոարցախյան դիրքորոշմամբ: Գերասիմ Վարդանյանի գործով քննչական խմբի ղեկավարը Սուրեն Նավոյանն է, այն անձը, որը .հանդիսանալով քննիչ, օրենքի ուժով՝ապաքաղաքական, չեզոք անձ, 2018 թվականին բարձրացել է ամբիոն, միացել Նիկոլ Փաշինյանի հեղափոխությունը, ինչից հետո տեղափոխվել է ԱԱԾ քննչական դեպարտամենտ ու դարձել ՀԿԳ ավագ քննիչ: Եվ այդ անձը Գերասիմ Վարդանյանին կալանավորելու միջնորդություն է ներկայացրել: Ընդ որում. Վարդանյանին կալանավորեցին նույն դեպքով չորրորդ փորձից, ինչն ապօրինի է: Մի խոսքով, նրան տարան կալանքի եւ բոլորիս հայտնի դատավոր Դավիթ Արղամանյանը, որը զբաղվում էր թմբուկ խփելով եւ համատեղության կարգով դարձավ նաեւ դատավոր, որոշեց կալանավորել Գերասիմ Վարդանյանին:
Կարդացեք նաև
Հիմա Գերասիմ Վարդանյանը կալանքի տակ է, բայց ես ողջ պատասխանատվությամբ ասում եմ, որ նա շատ ավելի ազատ է, քան իրեն կալանավորող դատավորը, իր գործով զբաղվող քննիչը, պետական պաշտոններ զբաղեցնող շատ-շատ անձինք»,-ասաց Բենիկ Գալստյանը:
Աշոտ ՀԱԿՈԲՅԱՆ
