«Ոչ աշխատանքային, տոնական օրով, ԲԴԽ-ն իր այդ հայտարարությամբ հավաստեց, որ սա քաղաքական գործ է»,- այսօր Հայաստանի Առաջին Հանրապետության հիմնադրման 104-ամյակի առթիվ կազմակերպած քննարկման ժամանակ ասաց փաստաբան, ԱԺԲ անդամ Արայիկ Պապիկյանն՝ անդրադառնալով այսօր առավոտյան «Սասնա ծռերի» ձերբակալությանը:
ԲԴԽ հայտարարությամբ ամրագրված է, որ մայիսի 26-ին, «Սասնա ծռերի» վերաբերյալ դատական ակտը մտել է ուժի մեջ: Ըստ փաստաբանի, դա ենթադրում է, որ մայիսի 26-ին Վճռաբեկ դատարանը որոշում է կայացրել՝ պաշտպանների ներկայացրած վճռաբեկ բողոքները չընդունելու մասին: Բայց այդ դեպքում, ըստ նրա, կա ընթացակարգ՝ որոշումը տարբեր ատյաններում շրջանառելու, որը ՀՀ-ում գործնականում տեւում է երեք ամիս: Իսկ այս պարագայում բավական արագ են եղել գործընթացները:
Նա հիշեցրեց նաեւ, որ ԲԴԽ-ի անդամներից մեկն այն անձն է, ով մեղադրական դատական ակտ է կայացրել «Սասնա ծռերի» նկատմամբ եւ փորձեց մեկ այլ մարմնում ապացուցել, որ օբյեկտիվ են աշխատել: «Վճռաբեկ դատարանի դատավորների կարծիքով, մեր հինգ բողոքներից ոչ մեկը ուշադրության արժանի կամ իրավաբանորեն հիմնավորված չի եղել եւ չեն քննել: Իրավաբանորեն այլեւս որեւէ բան չունենք անելու»,- ասաց պաշտպանը:
«Սասնա ծռերի» գործով Եվրոպական դատարան դիմելու հնարավորություններն, այսպիսով, չեն սահմանափակվում, պաշտպանները դրա համար չորս ամսյա ժամկետ ունեն:
Կարդացեք նաև
«Խնդիրը քաղաքական է, լուծումը լինելու է քաղաքական»,- հավելեց ԱԺԲ խորհրդի անդամ Ժիրայր Սեֆիլյանը՝ հայտարարելով, որ ինչպես 2018-ին այս համակարգը ստիպված եղավ ազատ արձակել «Սասնա ծռերի» անդամներին, այժմ ևս, ժողովրդի պարտադրմամբ, տղաներն ազատվելու են եւ շատ շուտ:
Ըստ ԱԺԲ անդամ Գարեգին Չուգասզյանի, «Սասնա ծռերի» այսօրվա ձերբակալումը հստակ ուղերձ է, թե ում է ուղղված այս գործողությունը. «Հայաստանում սրանով, սկսվում են չեզոքացվել իրապես ինքնիշխանությանը սատարող ուժերը»,- ասաց նա:
Նելլի ԳՐԻԳՈՐՅԱՆ
