Մայիսի 6-ին Արմավիրի մարզի ոստիկանությունում քրեական գործ է հարուցվել, թե իբր «Դիմադրության» շարժման անդամներ՝ ՀՅԴ-ական Արծվիկ Մինասյանը եւ ՀՀԿ-ական Տարոն Մարգարյանը հավաքի մասնակիցներին գումար են բաժանել: Այս մասին քիչ առաջ Ֆրանսիայի հրապարակում հայտարարեց Արծվիկ Մինասյանը (լուսանկարում):
Գործի մանրամասներին անդրադարձան փաստաբաններ Սերգեյ Հարությունյանը եւ Բենիկ Գալստյանը: Սերգեյ Հարությունյանի կարծիքով՝ ընդդիմադիր գործիչների նկատմամբ այս օրերին քաղաքական «տեռոր» է իրականացվում եւ գնալով այն ձնագնդի էֆեկտ է ստանում՝ աբսուրդի հասնելով. «Պարոն Մինասյանին այսօր հրավիրել էին Արմավիրի քննչական վարչություն, եւ աբսուրդն այն է, որ որպես վկա-կասկածյալ հարցաքննել են անձի, ով ԱԺ պատգամավոր է: Ապօրինությունն այն աստիճանի է խորացել, որ առանց ԱԺ-ի թույլտվության, առանց ԱԺ-ի համաձայնության, ԱԺ պատգամավորին հարցաքննության են կանչում եւ կասկածյալի կարգավիճակ ունի»:
Անդրադառնալով ցուցարարներին բերման ենթարկելու այսօրվա դրվագներին էլ, Սերգեյ Հարությունյանը նկատեց, որ ոստիկանները բերման էին ենթարկում հատուկ խոշտանգելով եւ նպատակը միայն ֆիզիկական ցավ պատճառելը չէր, այլ ընդհանրապես, վախի մթնոլորտ ստեղծելը: Պաշտպանը վտանգավոր է համարում «ժողովրդավարության բաստիոն» կոչվող երկրում բռնաճնշումների եւ անօրինականությունների առկա մակարդակը եւ միջազգային կառույցների, իրավապաշտպանների, այդ թվում նաեւ՝ տեղական, անտարբերությունն այդ ամենի հանդեպ:
Արծվիկ Մինասյանը նաեւ հայտարարեց, որ այսօր «Դիմադրություն» շարժման երկու անդամների` Սևադա Ղուկասյանին և Ալեքսան Ասատրյանին, ուժային կառույցներն ուղղակի առևանգել են։ «Այս արարքները բնորոշ են ԱԱԾ-ին։ Անհայտ ուղղությամբ տարել էին, և մինչ այս պահը ոչ մի տեղեկություն չունենք մեր ընկերների` Սևադա Ղուկասյանի և Ալեքսան Ասատրյանի մասին։ Քիչ առաջ միայն տեղեկացանք, որ փաստաբանական թիմը սկսում է ներգրավվել այս գործում»,- ասաց Մինասյանը։
Կարդացեք նաև
Մանրամասները՝ տեսանյութում:
Նելլի ԳՐԻԳՈՐՅԱՆ
