«Ամսի 13-ի հայտարարությունից հետո նա (Նիկոլ Փաշինյանը-Ն. Գ.) պետք է կալանավորվեր: Ինքնախոստովանանք է, մարդն ասում է՝ ես եմ սպանել այդ երեխաներին, իսկ քննչականում, մեզ ասում են՝ չենք կարող հարցաքննության կանչել՝ հիմքեր չկան»,- «Հայելի» մամուլի ակումբում հայտարարեց 44 օրյա պատերազմում զոհված Դավիթ Զաքարյանի հայրը՝ Աշոտ Զաքարյանը: Նա վստահ է, որ Հայաստանում իրավական համակարգը մեկ կետից է ուղղորդվում, ու դա է պատճառը, որ անգամ 44-օրյա պատերազմի հանգամանքներին վերաբերվող գործերն այդ ճակատագրին են արժանացել:
Ինչպես հայտնի է, դեռ մեկ ամիս առաջ զոհվածների ծնողները դիմել էին ՀՀ գլխավոր դատախազություն՝ տուժողի իրավահաջորդ ճանաչվելու համար: Նաեւ՝ պահանջում էին, որ Նիկոլ Փաշինյանը մեղադրյալի կարգավիճակ ստանա եւ խափանման միջոց ընտրվի կալանավորումը: Հիմքը՝ ապրիլի 13-ին Նիկոլ Փաշինյանի՝ ԱԺ-ում ունեցած ելույթն է, որտեղ նա հայտարարել էր. «Այո՛, պատերազմը հնարավոր էր կանխել, արդյունքում կլիներ նույն իրավիճակը, սակայն՝ առանց զոհերի»:
Զոհվածների ծնողներին գլխավոր դատախազությունը կարգավիճակ տվեց եւ գործը տեղից չի շարժվում: Այսօր, զոհվածների հարազատների անունից միջնորդություն է ներկայացվել՝ ՀՀ քննչական կոմիտեի եւ կառույցի ղեկավար Արգիշտի Քյարամյանի ինքնաբացարկի համար. նրա եւ առհասարակ, գործող իշխանության նկատմամբ ծնողներն անվստահություն ունեն:
Զոհվածների հարազատները պահանջում են, որպեսզի նիկոլ Փաշինյանը գնա եւ դատարանում իր անմեղությունն ապացուցի, տա մեղավորների անունները ու մեղավորները պատժվեն: Նրանք նաեւ փաստում են, որ մինչ օրս, զոհվածների ծնողների նկատմամբ բարեհամբույր է գտնվել գլխավոր դատախազ Արթուր Դավթյանը եւ ոչ միայն խոսքով, այլ նաեւ քայլերով. որեւէ միջնորդություն չի անտեսվել, բոլորն էլ քննվել են, պատասխաններ են ստացել:
Կարդացեք նաև
«Մենք էլ կորցնելու բան չունենք, պետք եղավ՝ կտրուկ քայլերի էլ կդիմենք»,- ասաց Աշոտ Զաքարյանը:
Ծնողները վստահ են, որ «այս ավանտյուրային» վերջ կգա:
Նելլի ԳՐԻԳՈՐՅԱՆ
