Հասարակական գործիչ Հռիփսիմե Առաքելյանը, որը երեկ է վերադարձել Արցախից, «Հայելի» ակումբում, պատմելով տպավորությունների մասին, ասաց, որ հոգեբանորեն դժվար է Ստեփանակերտի ճանապարհին Շուշիի տակի անցակետի մոտով անցնելը, որտեղ ադրբեջանցիներն են հսկողություն իրականացնում: «Բայց երբ հասնում ես տեղ, ամեն ինչ փոխվում է: Չնայած Հայաստանի իշխանությունների վարած թրքամետ քաղաքականությանը, որ ուզում են վերջնականապես ազատվել Արցախից եւ իրենց ադրբեջանցի եղբայրների հետ դրանց լեզվով ասած՝ արիշ-վերիշ, լոլիկի առեւտուր անեն, արցախցիները, որոնց համար հիմա սարսափելի անորոշ վիճակ է, բացարձակապես տրամադրված չեն երկրից դուրս գալ ու բացարձակ չեն կարող ընդունել այսօրվա իշխանության թեզերը:
Ինձ դուր եկավ, որ կյանքն Արցախում շատ ակտիվ հունով է ընթանում: Տեսեք, մենք Երեւանում փորձ չենք անում որեւէ նախաձեռնություն հանդես բերել, ասենք, տան վերանորոգում, իսկ այնտեղ մի շարժ կար, որը տեսել եմ Ստեփանակերտում, Մարտակերտում, գյուղերում: Մարդիկ շինարարություն են անում, իրենց տներն են վերանորոգում, տան համար գույք են գնում: Ու ոմանք կարող են զարմանալ:
Երբ նրանց հարցնում էի, թե վախ չունե՞ն, որ Արցախը կարող է հայտնվել Ադրբեջանի կազմում, պատասխանում էին, որ այդպիսի մտահոգություն չունեն: Եվ այդ վստահությունը նրանց տալիս է նաեւ ռուսական խաղաղապահ ուժերի ներկայությունը, որոնք այնտեղ լուրջ գործառույթներ, երկարաժամկետ ծրագրեր են իրականացնում»,-ասաց Հռիփսիմե Առաքելյանը:
Աշոտ ՀԱԿՈԲՅԱՆ
