«Դժվար է լավ բան ասել մի գործընթացի մասին, որը համապատասխանում է թուրք-ադրբեջանական ահաբեկչական ոհմակի տեսլականին։ Կապ չունի՝ անունը Բրյուսե՞լ է, թե այլ հարթակ»,-«Sputnik Արմենիա»-ում լրագրողների հետ հանդիպմանն այսօր հայտարարեց ԱԺ «Բարգավաճ Հայաստան» խմբակցության նախկին պատգամավոր Արման Աբովյանը՝ անդրադառնալով Բրյուսելում Եվրամիության խորհրդի նախագահ Շառլ Միշելի հովանու ներքո կայացած բանակցություններին։
«Երբ այս կամ այն ձեւաչափով մեր ականջներին կախում են խաղաղության դարաշրջան, որն իրականում արհավիրքի եւ մեծ կորուստների դարաշրջան է, շատ տարօրինակ է նման դեպքում անգամ կիսադրական որակումներ տալը։ Պարզ է, որ պայմանական արեւմուտքն ուզում է նվազագույնի հասցնել ՌԴ ազդեցությունը տարածաշրջանում։ ՀՀ սուվերեն տարածքներն օկուպացված են, ի՞նչ սահմանազատում եւ սահմանագծում։ Թուրքիայում հայտնի խոսք ունեն․ Թուրքիան ավարտվում է այնտեղ, որտեղ կանգնած է ասքյարի ոտքը։ Ինչ-որ մեկը հույս ունի, որ սահմանազատմամբ օկուպանտներին դուրս են հանելո՞ւ»,-հարցադրում արեց նա։
Արման Աբովյանի խոսքով․ «Միայն մեծ կենացներ կան, թե մենք ուզում ենք խաղաղություն, որ պատերազմ չլինի։ Գաղտնիք բացեմ նրանց համար, ովքեր հույսեր ունեն, թե թուրք-ադրբեջանական ոհմակի հետ «համբուրվելով»՝ կարող են հասնել խաղաղության։ Խաղաղությունը երաշխավորվում է միայն պետական աջակցությամբ պաշտպանվելու դեպքում։ Աշխարհաքաղաքական կենտրոնները հումանիստական գաղափարների ներկայացուցիչներ չեն, որ երջանիկ դեմքով ասենք՝ պատերազմ չենք ուզում, եկեք բարիշենք։ Հարց է առաջանում՝ մե՞նք ենք պատերազմել ու կոտորել։ Ոչ, մեր հանդեպ է եղել կոտորածը»։
Արման Աբովյանի համոզմամբ՝ կրթության հետ խնդիրներ ունեն նրանք, ովքեր պաշտպանում են 100 տարի առաջ մեր մեջ մտցվել է, թե թուրքը թշնամի է թեզը․ «Մինչեւ վերջ անկեղծ չեն․ թուրքն է մեր մեջ յաթաղանով մտցրել, որ ինքը թշնամի է։ Մենք չենք մտել վառել թուրքական գյուղերը, երեխաներին էլ՝ Դեր զորի անապատում շնագայլերի կեր դարձրել։ Թուրքիան չի փոխվել, ընդունեք սա։ Թուրքիան ասում է՝ ինքը չի ատում մեզ, բայց կա իրականություն՝ այդ պետությունն ուզում է ընդլայնվել։ Մենք համաձա՞յն ենք «պարարտանյութ» դառնալ թուրքական նախագծերի համար՝ անունը դնելով խաղաղության դարաշրջան։ Մեզ ուզում են ոչնչացնել ոչ թե նրա համար, որ մեզ ատում են, այլ որովհետեւ մենք խանգարում ենք նրանց։ Ինչի կոտորածը միայն յաթաղանո՞վ է լինում։ Նախիջեւանում կոտորած չի եղել, բայց հայաթափվեց՝ տունը առնում էին, պայմանները բացառում, ասում՝ գնացեք ձեր Հայաստանը։ Ի՞նչն է խանգարում, որ նույնը անեն ՀՀ-ում։ Իրատես եղեք»։
Կարդացեք նաև
Լուիզա ՍՈՒՔԻԱՍՅԱՆ
