«Հեռանկարները վատն են, որովհետեւ գործընթացները, չգիտես ինչու, տեղի են ունենում ՀՀ-ի հաշվին։ Հիշեցնեմ, որ ՀՀ-ն չէ փակել սահմանը, այլ Թուրքիան»,- «Sputnik Արմենիա»-ում լրագրողների հետ հանդիպմանն այսօր հայտարարեց ԱԺ «Բարգավաճ Հայաստան» խմբակցության նախկին պատգամավոր Արման Աբովյանը՝ անդրադառնալով ՀՀ-Թուրքիա կարգավորման գործընթացի ներկայիս փուլին։
«Ի՞նչ են քննարկում այդ հանդիպումներում։ Հայտնի են Թուրքիայի նախապայմանները։ Որքան էլ այս իշխանությունը հայտարարի, թե Թուրքիան նախապայմաններ առաջ չի բրդել, այդպես չի՝ դրանք կան, որոնք մասնակի հաստատեց նաեւ ՀՀ ԱԳ նախարարը։ Հայոց ցեղասպանության խնդիրը ոչ միայն բարոյահոգեբանական է կամ արդարության հարց, այլեւ լրջագույն աշխարհաքաղաքական գործիք Թուրքիայի դեմ։ Խոսքն արդարության գալու գործիքի մասին է միջազգային հանրության առաջ։ Թուրքիան մի կողմից փորձում է մաքրվել բարբարոս-մարդասպանի կերպարից, մյուս կողմից՝ չեզոքացնել միջազգային ճնշման գործիքը»,-նշեց Արման Աբովյանը
Նրա խոսքով՝ Թուրքիայի պես ահաբեկչական երկրի հետ, որն ունի ՀՀ տարածքների հաշվին մեծ Թուրանի գաղափար, ի՞նչ է բանակցում ՀՀ իշխանությունը․ «Մի իշխանական պատգամավոր կա, որ փրփուրը բերանին ասում էր, թե չկա պանթուրան։ Հաջորդ օրը Թուրքիան հայտարարեց, որ ձեւավորվում է թուրքալեզու պետությունների բանակ։ Ուղարկեցի դա նրան, բնականաբար, արձագանք չստացա»։
Լուիզա ՍՈՒՔԻԱՍՅԱՆ
