Մայիսի 13-ին և 23-ին Առաջատար տեխնոլոգիաների ձեռնարկությունների միության (ԱՏՁՄ) գրասենյակում տեղի ունեցավ «Հայաստանի տեխնոլոգիական ապագան» ծրագրի խորհրդի հիմնադիր նիստը։ Նիստում հաստատվեցին ծրագրի աշխատակարգը, համագործակցության համաձայնագիրը, հաստատվեցին համագործակցության հիմնական սկզբունքներն ու ուղղությունները։
Հիմնադիր խորհրդում ընդգրկվեցին ԱՏՁՄ-ն՝ ի դեմս գործադիր տնօրեն պարոն Հայկ Չոբանյանի, Երևանի պետական համալսարանը՝ ի դեմս ռեկտոր պարոն Հովհաննես Հովհաննիսյանի, Հայաստանի ազգային ագրարային համալսարանը՝ ի դեմս ռեկտոր պարոն Վարդան Ուռուտյանի, Հայաստանի ամերիկյան համալսարանը՝ ի դեմս նախագահ տիկին Կարին Մարկիդեսի, Հայաստանում ֆրանսիական համալսարանը՝ ի դեմս ռեկտոր պարոն Բերտրան Վենարի և Հայ-ռուսական համալսարանը՝ ի դեմս ռեկտոր Արմեն Դարբինյանի։ Խորհրդի նիստերին մասնակցում են նաև ՀՀ փոխվարչապետերի գրասենյակների ներկայացուցիչները։
Հիմնադիր խորհրդի անդամները հույս հայտնեցին, որ տվյալ հարթակի մասնակիցները ձեռք ձեռքի տված բեղուն համագործակցություն կծավալեն նախանշված թիրախային ուղղություններով, որոնք են՝ արհեստական բանականություն, առաջնորդություն և կառավարում, տեղական կլաստերների կարողությունների զարգացում, STEM կրթության խթանում, նորարարություն։ Առաջատար տեխնոլոգիաների ձեռնարկությունների միությունն ստանձնեց ծրագրի քարտուղարությունը։
Հանդիպման ընթացքում նաև տեղի ունեցավ հիմնադիր խորհրդի ներկա և ապագա նախագահների ընտրությունը։ Ներկա նախագահ ընտրվեց ՀԱՀ նախագահ Կարին Մարկիդեսը։ Ապագա նախագահ ընտրվեց Հայաստանի ազգային ագրարային համալսարանի ռեկտոր Վարդան Ուռուտյանը։
Կարդացեք նաև
Նախաձեռնության նպատակն է Հայաստանի տեխնոլոգիական զարգացման անհրաժեշտ արդյունքներին հասնելու համար գիտակրթական ծրագրերի իրականացումը, դրանց շրջանակներում գիտակրթական հաստատությունների, տեխնոլոգիական ոլորտի, ինչպես նաև պետություն մասնավոր երկխոսության զարգացումը։ Այն հանդես է գալիս որպես կողմերի միջև բաց համագործակցության, կարողությունների զարգացման և գերակա նպատակների իրականացման հարթակ։ Նշենք, որ հարթակը բաց է բուհերի և գիտահետազոտական կազմակերպությունների մասնակցության համար։
Առաջատար տեխնոլոգիաների ձեռնարկությունների միություն
