«Այն աճի, ինչի մասին խոսում եմ, գնաճով ճշգրտված աճն է: Դա այն աճն է, որը իսկապես մարդիկ զգում են իրենց մաշկի վրա: Եթե դուք խոսեք բիզնեսների հետ, ապա նրանց մոտ առեւտուրն աճել է միջինում 30-50 տոկոսով: Բայց եթե գնաճային բաղադրիչը հանենք՝ կստացվի 10-15 տոկոսով»,-կառավարության այսօրվա նիստից հետո, լրագրողների հետ ճեպազրույցում ասաց էկոնոմիկայի նախարար Վահան Քերոբյանը:
Ըստ նրա, տարբեր հոռետեսական կանխատեսումներ չեն իրականանում, եւ ունենք տնտեսական բավական լավ արդյունքներ. «Գնում ենք բավական լավ հետագծով: Կառավարության այսօրվա նիստում վարչապետ Նիկոլ Փաշինյանն անդրադարձ կատարեց տնտեսական ցուցանիշներին, ըստ որոնց՝ այս տարվա ապրիլին, նախորդ տարվա ապրիլի համեմատ, ունենք 8.8 տոկոս տնտեսական ակտիվության ցուցանիշի աճ, իսկ չորս ամսվա տվյալներով՝ տնտեսական ակտիվության ցուցանիշի աճը կազմում է 9.4 տոկոս։ Սա այն տնտեսական աճն է, որ իսկապես մարդիկ զգում են իրենց մաշկի վրա: Սա ազդում է նաեւ մարդկանց աշխատավարձերի վրա»:
Նախարարի խոսքով, կառավարությունը փորձում է միջոցները բաշխել այնպես, որպեսզի առավել խոցելի խավը կարողանա հավասարեցնել իր կյանքի որակն այն անձանց հետ, որոնք առաջինն են օգտվում տնտեսական աճի բարիքներից: Ասաց, որ արդեն ուրվագծվել են 2023 թվականի բյուջեում իրենց մեր անելիքները:
Կարդացեք նաև
Լուսինե ԲՈՒԴԱՂՅԱՆ
