«Հուսամ՝ սա սենսացիա չի դառնա, բայց հիմա բանակցություններ են ընթանում՝ բանակցություններ սկսելու ձեւաչափի մասին»,-ԱԺ-կառավարություն հարցուպատասխանի ժամանակ այսօր անդրադառնալով հարցին, թե Ադրբեջանի հետ խաղաղության պայմանագրի գործընթացն ինչ փուլում է՝ ասաց վարչապետ Նիկոլ Փաշինյանը։ «Բայց բուն՝ ֆորմատավորված բանակցությունները․․․ԱԳ նախարարություններն աշխատում են իրար հետ, դեռեւս չենք կարող դա ասել։ Կան հարցեր, որոնք էական են։ Չի բացառվում, որ օրակարգի դասավորման վերաբերյալ ձեւավորվի որոշակի ըմբռնում»։
Փաշինյանի խոսքով՝ նաեւ ընդդիմությունն է սկսել խոսել այն մասին, թե Ադրբեջանի հետ խաղաղության պայմանագրի թեման պետք է կապե՞լ Արցախի հակամարտության խնդրի հետ, թե՞ դիտարկել տարանջատված։ Փաշինյանը շեշտեց, որ այս հարցը քննարկում են քաղաքական շրջանակների հետ, թեեւ ընդդիմադիրները հրաժարվում են հանդիպումների առաջարկներից։ Նիկոլ Փաշինյանի խոսքով՝ Արցախի իշխանության կարծիքն այս հարցում եւս որոշիչ է լինելու։
Լուիզա ՍՈՒՔԻԱՍՅԱՆ
