ԱԺ-կառավարություն հարցուպատասխանի ժամանակ այսօր ՔՊ խմբակցության պատգամավոր Արման Եղոյանը հիշեցրեց Եվրամիության խորհրդի նախագահ Շառլ Միշելի հայտարարությունում մատնանշված «Ղարաբաղի էթնիկ հայություն» ձեւակերպումը եւ նշեց, որ ըստ որոշ կարծիքների՝ սա նահանջ է Արցախի ժողովրդի ինքնորոշման իրավունքից, ԵԱՀԿ ՄԽ համանախագահության ձեւաչափից, Արցախի՝ առանձին կարգավիճակ ունենալու հնարավորություններից։ Ի պատասխան վարչապետ Նիկոլ Փաշինյանը նախ նշեց, որ ԵԱՀԿ ՄԽ համանախագահողներից առնվազն երկուսը ողջունել եւ աջակցել են Շառլ Միշելի հետ բանակցությունները։
«Համանախագահողներից ՌԴ-ի նախագահի հետ մեր երկկողմ հայտարարության մեջ արձանագրվել է հակամարտության կարգավորման կարեւորությունը։ Իսկ Բրյուսելում տեղի է ունեցել շատ լուրջ քննարկում, որի արդյունքում ամրագրվել են ՀՀ-ի եւ Ադրբեջանի դիրքորոշումների տարբերությունները, որոնք արտահայտված են հրապարակայնորեն։ Ադրբեջանը համարում է, որ Արցախի հիմնախնդիրը լուծված է, իսկ ՀՀ-ն՝ ոչ։ Խաղաղության բանակցությունների համատեքստում Ադրբեջանը ներկայացրել է հինգ սկզբունքներ, մենք էլ՝ մեր օրակարգը եւ ասել ենք, որ այդ հենքի վրա պետք է լինեն բանակցություններ։ Մեր առաջադրած սկզբունքներում արձանագրված են ԼՂ հայության անվտանգությունը, իրավունքները, ԼՂ վերջնական կարգավիճակի ճշգրտումը։ Քանի որ քննարկումների արդյունքում համաձայնություն չի ձեւակերպվել կողմերի միջեւ ձեւակերպումների շուրջ, ԵՄ խորհրդի նախագահը որոշել է իր կողմից անել մեկնաբանություններ, որոնք, իր տեսակետից, հնարավորինս շատ տարրեր կարտահայտեն երկու կողմերի դիրքորոշումներից»,-նշեց Փաշինյանը։
Թե որքանով է դա ստացվել, ըստ նրա, այլ խոսակցություն է․ «Այլ բան, որ մենք մեր դիրքորոշումն արտահայտել ենք եւ դրանում որեւէ փոփոխություն չկա»։
Կարդացեք նաև
Լուիզա ՍՈՒՔԻԱՍՅԱՆ
