Սյունիքի մարզի ընդհանուր իրավասության դատարանի այս տարվա ապրիլի 12-ի որոշմամբ բավարարվել էր «Ցորի գործով» տուժող կողմի միջնորդությունը՝ գործի տարածքային ընդդատությունը փոփոխելու մասին, եւ գործի քննությունը հանձնվել էր Երեւան քաղաքի ընդհանուր իրավասության դատարան: Դատավորն է Ա. Գաբրիելյանը:
Մայիսի 20-ին «Ցորի գործով» ամբաստանյալ Գեւորգ Գեւորգյանի դեմ հարուցված քրեական գործով դատական նիստը հետաձգվեց: Այն նշանակվեց օգոստոսի 9-ին, ժամը 12.30-ին:
ՊԲ հրետանային դիվիզիոնի շտաբի պետ-հրամանատարի տեղակալ, կոչումով մայոր Գեւորգ Գեւորգյանը մեղադրվում է հանրորեն վտանգավոր արարքի կատարման համար: Նիստը դեռ նոր էր սկսվել, երբ պարզվեց, որ ամբաստանյալը չի ստացել մեղադրական եզրակացությունը, չնայած դատախազն ասաց, թե ամբաստանյալը հրաժարվել է ստանալ՝ այն ուղարկվել է քրեակատարողական հիմնարկ:
Նիստերի դահլիճում տուժողների՝ Ցոր զորամասի տղաների լուսանկարներն էին:
Կարդացեք նաև
Տուժողների իրավահաջորդները նկարները պարզել էին ամբաստանյալին, իսկ նրա պաշտպանը՝ Գոռ Գեւորգյանը, լրագրողներին ասաց. «Հատուկ նրա համար, որ նա կենդանի է մնացել, արժանանում է նման անարգանքի, իսկ թե ովքեր են իրական մեղավորները, չի ասվում»:
Մայոր Գեւորգ Գեւորգյանն ըստ մեղադրանքի, 2020թ. հոկտեմբերի 12-ին, ժամը 6-ի սահմաններում (Վարանդայի) Ֆիզուլիի շրջանում գտնվող «Զովառլու» կոչվող տեղամասում մարտական գործողություններին մասնակցելու ընթացքում ԳԱԶ մակնիշի զինմեքենայով փախուստի է դիմել կրակային դիրքից: Առանց ղեկավարման մնացած մարտկոցի անձնակազմը խուճապի է մատնվել՝ փորձելով հնարավոր միջոցներով պաշտպանվել, Գեւորգյանի նման գործողությունները հասցրել են ծանր վնաս, զոհվել են մարտկոցի քսան պահեստազորայիններ, զինծառայողներ: Նրանք էին՝ Նվեր Էդուարդի Ավանեսյանը, Վահե Սերգեյի Ավագյանը, Վաչագան Գարիկի Հարությունյանը, Կարեն Բորիսի Դանիելյանը, Նաիրի Գրիգորի Բաղդասարյանը, ժամկետային զինծառայողներ՝ Գեորգի Արմենի Բալայանը, Սամվել Արթուրի Ղազարյանը, Արթուր Արմենի Ասրյանը, Լեւոն Մհերի Գրիգորյանը, Դավիթ Լեւոնի Ազատյանը, Արտյոմ Արտակի Տեփանյանը, Ռուբեն Արսենի Պողոսյանը, Նարեկ Արմենի Օհանյանը, Արտակ Ջիվանի Միքայելյանը, Հայկ Մհերի Պապիկյանը, Վահե Արթուրի Պապյանը, Հայկ Հովհաննեսի Անտոնյանը, Գոռ Գեւորգի Ափանոսյանը, Սամվել Ստեփանի Պողոսյանը, Հայկ Սարգսի Մելիքյանը:
Ռուզան ՄԻԱՆՍՅԱՆ
«Առավոտ» օրաթերթ
24.05.2022
