«Այդ մասին ես առաջին անգամ իմանում եմ ձեզնից, ես որևէ բանի վերաբերյալ ծանուցում չեմ ստացել, ուստի այլ մանրամասների չեմ տիրապետում», – Aravot.am-ի հարցին՝ արդյոք ծանուցում ստացե՞լ է, տեղյա՞կ է, որ ՀՀ ԱԱԾ քննչական վարչությունում քննություն է վարվում յուրացման կամ վատնման հիմքով քրեական գործի հետ կապված, որում շոշափվում է նաև իր անունը, այսպես պատասխանեց Հանրային ռադիոընկերության գործադիր տնօրեն Գարեգին Խումարյանը:
Aravot.am-ի ստացած տեղեկությունների համաձայն՝ ՀՀ քր. օր. 179 հոդվածի 2-րդ մասի 1-ին և 2-րդ կետերի հատկանիշներով՝ գործի նյութեր են նախապատրաստվում: Ըստ տեղեկությունների՝ Հայաստանի հանրային ռադիոընկերության տնօրենը, հանդիսանալով պաշտոնատար անձ, Վ.Հ.-ի հետ կնքել է ծառայությունների մատուցման պայմանագիր, սակայն վերջինս 2021-ի հուլիսից ծառայություններ է մատուցել և ամեն ամիս վճարել՝ այսինքն՝ ըստ գործի նյութերի՝ «յուրացման եղանակով հափշտակել է խոշոր չափերի գումար»:
Գարեգին Խումարյանը մեզ հետ զրույցում ասաց՝ այո, Վիգեն Հովհաննիսյանն իրենց նախկին աշխատակիցն է եղել ու շարունակեց. «Նա մեզ մոտ աշխատել է՝ որպես քաղպաշտպանական հարցերով խորհրդատու: Նա մեր լավագույն աշխատակիցներից մեկն է եղել, աշխատել է քաղիրավական պայմանագրով: Վիգեն Հովհաննիսյանի հետ կապված հիմնարկը որևէ պարտք ու պահանջ չունի»:
Տաթև ՀԱՐՈՒԹՅՈՒՆՅԱՆ
