Մայիսի 6-ին, ԱՀ մարդու իրավունքների պաշտպան Գեղամ Ստեփանյանը տեղեկացրել էր, որ Մարտակերտ-Դրմբոն ճանապարհի 24-րդ կմ-ում, ադրբեջանական շարասյան կազմում երթևեկող բեռնատարը՝ դուրս գալով ճանապարհի հանդիպակաց հատված, կցորդիչով բախվել է արցախյան գրանցման «Ռենո Լոգան» տաքսի ծառայություններ մատուցող մեքենային, որի հետևանքով մեքենան 12 մետր գլորվել է ճանապարհի աջ հատվածում գտվող ձորը։
Երեկ Ստեփանակերտում «Ապագա հայկականի» ֆորումի ժամանակ, լրագրողների հետ զրույցում, Գեղամ Ստեփանյանն անդրադառնալով միջադեպին՝ ասաց, որ քրեական գործ է հարուցվել: Նա հորդորեց՝ թերահավատորեն չվերաբերվել այդ հանգամանքին, քանի որ պետք ցույց տալ, որ Ադրբեջանը ուղիղ դիտավորությամբ է նման գործողության դիմել. «ՄԻՊ-ի կողմից փաստերը հավաքագրվել են, դրանք ցույց են տալիս, որ ուղիղ դիտավորություն կար՝ հատկապես, հաշվի առնելով այն հանգամանքը, որ մեքենան հրելուց հետո, ադրբեջանական բեռնատարը չի կանգնել, ինչը քրեորեն պատժելի արարք է: Այդ ամենը պետք է ցույց տալ»:
Գեղամ Ստեփանյանը տեղեկացրեց, որ նախորդ 1,5 տարվա զեկույցներում, 100-ից ավելի քրեական գործեր են հարուցվել՝ Ադրբեջանի կողմից Արցախի ժողովրդի իրավունքների խախտման մասին. «Եթե անգամ չի հաջողվում մեղավորներին պատասխնատվության ենթարկել, մենք պետք է ցույց տանք Ադրբեջանի կողմից հայատյաց քաղաքականության շարունակականությունը: Դա է պատճառը, որ Ալիևը տարբեր հարթակներում, զրույցների ժամանակ ասում է, որ դրանք հազվադեպ դեպքեր են. այսինքն, ինքը ուզում է այնպես անել, որ միջազգային հանրության աչքի առաջ այդ դեպքերը համակարգային չերևան: Մեր խնդիրը հակառակն է՝ ներկայացնել, որ դրանք համակարգային են, որ այն ուղղորդվում է մեկ կենտրոնից ու հատուկ է արվում՝ Ադրբեջանի իշխանությունների կողմից»:
Կարդացեք նաև
Նելլի ԳՐԻԳՈՐՅԱՆ
