Պատերազմից հետո Ադրբեջանի վերահսկողության տակ անցած Վարանդայում և Շուշիում այսօր լայն թափով շինանրարական աշխատանքներ են ընթանում: Գորիս-Բերձոր-Ստեփանակերտ ճանապարհի՝ դեպի Ստեփանակերտ գնացող հատվածից հստակ երևում է շինարարական ողջ եռուզեռը:
Ստեփանակերտում, «Ապագա հայկականի» ֆորումի ժամանակ, լրագրողների հետ զրույցում՝ պատասխանելով ճանապարհաշինարարությանը վերաբերվող հարցին, Արցախի մարդու իրավունքների պաշտպան Գեղամ Ստեփանյանը մտահոգություն հայտնեց՝ վտանգավոր որակելով ճանապարհաշինարարությունը. «Առաջին հերթին, վտանգավոր է, քանի որ իրենք օկուպացրել են մեր տարածքները ու այնտեղ ապօրինի շինարարություն է ընթանում»:
Խոսելով մեկ այլ՝ Բերձոր քաղաքը շրջանցող ճանապարհի շինարարության մասին, որն անցնելու է Հին Շեն, Մեծ Շեն գյուղերի միջով, Գեղամ Ստեփանյանն ասաց, որ իր ունեցած տեղեկության համաձայն, ճանապարհը պետք է շրջանցի Բերձորը, նաև՝ Աղավնո համայքը. «Բայց դեռևս հստակեցված չէ Բերձորում և Աղավնոյում հայկական բնակչություն լինել-չլինելու հարցը. մեր կողմից շարունակում են պնդել, որ հնարավորություններն, այնուամենայնիվ, պահպանվեն»:
Նելլի ԳՐԻԳՈՐՅԱՆ
