Պատերազմի ընթացքում հաշմանդամություն ձեռք բերած զինվորների առաջին խումբը Երուսաղեմ է մեկնելու մայիսի 26-ին՝ հանգստի՝ ՔՊ պատգամավորներ Նարեկ Զեյնալյանի եւ Լուսինե Բադալյանի հետ: ԱԺ պաշտպանության եւ անվտանգության հանձնաժողովն ասօր այդ զինվորների հետ հանդիպում էր կազմակերպել ԱԺ-ում:
Հանձնաժողովի նախագահ Անդրանիկ Քոչարյանը ներկայացրեց Երուսաղեմ այցի կազմակերպչական հարցերը. զինվորները հատուկ հարմարեցված մեքենայով ԱԺ-ի մոտից գնալու են նախ Թիֆլիս, որովհետեւ Վրաստանով է իրականացնում թռիչք այն ընկերությունը, որն ունի ներքին գործերի նախարարության լիցենզիա, ինչն այս դեպքում անհրաժեշտ է. «Իսրայել մտնել- դուրս գալուց նույնիսկ ատամի միջի պլոմբը ստուգում են, պարոն Զեյնալյան, որ իմանաք, հանկարծ մեջը խարդախություն չլինի: Ես քանի որ եղել եմ, ասեմ, որ իրենք հենց այդպիսի միջոցառումների շնորհիվ է, որ կարողանում են բարդ միջավայրում այդքան տարի դիմակայեն: Սա իր բնույթով ուխտագնացություն է, այնտեղ կհանդիպեք շատ հրաշալի մեր դեսպանին՝ Արմեն Հակոբյանին: Կմասնակցեք շատ միջոցառումների, կիմանաք, թե ինչպիսի կարողությունների տեր ենք մենք Երուսաղեմում»:
Անդրանիկ Քոչարյանն ասաց, որ առաջին խմբում «Զինվորի տան» ցուցակով սայլակով տեղաշարժվող զինվորների չեն ընդգրկել, որովհետեւ Երուսաղեմում աստիճանները շատ-շատ են. «Կտեսնենք՝ ոնց ենք այդ աստիճանները հաղթահարելու: Եթե հաղթահարելու տարբերակ կա, մյուս խմբերը կարող ենք անել 8 հոգի առանց սայլակ, երկու հոգի՝ սայլակով»:
Անդրանիկ Քոչարյանը հրեական ասացվածք մեջբերեց. «Ով փրկում է մի կյանք, փրկում է աշխարհը. սա մեծ խորհուրդ ունի»:
Կարդացեք նաև
Վերջում Քոչարյանը զինվորներից ճշտեց՝ անձնագրերում կա՞ Իրանում լինելու փաստ. «Դա որ լիներ, իմացեք, ուզում է վերեւից Աստված էլ գար… Չնեղվեք, եթե ձեզ Երուսաղեմում շատ հարցեր տան»: Այսպես մի շարք խորհուրդներ տալուց հետո միասին լուսանկարվեցին ու պայմանավորվեցին ուղեւորության օրն ու ժամը:
Հռիփսիմե ՋԵԲԵՋՅԱՆ
