Երեւանում շարունակվող անհնազանդության ակցիաներին մասնակցում են նաեւ վանաձորցիները: «Հայրենիք» խմբակցության Լոռու մարզային կառույցի ղեկավար, Վանաձորի ավագանու անդամ Վահե Դոխոյանն այս ընթացքում մի քանի անգամ բերման է ենթարկվել, սակայն, ինչպես ինքն է ասում, սա արժանապատվության շարժում է, եւ պետք է գնան մինչեւ վերջ. «Սա արժանապատվության շարժում է, որտեղ չկա ո՛չ շեշտադրված կուսակցական պատկանելիություն, որտեղ չկա ո՛չ ակնհայտ լիդերներ եւ այլն: Մենք հայտարարել ենք, որ մեզ համար լիդերը հայ ժողովուրդն է, եւ նպատակը՝ Հայաստանի և Արցախի անվտանգության խնդիրն է»,- ասաց Դոխոյանն ու շարունակեց. «Մնացած ամեն ինչի շուրջ շարժման առաջնորդները, յուրաքանչյուրս պատրաստ ենք բանակցել այս նպատակների շուրջ եւ շարժվել առաջ»:
Ներկայացնելով իրավիճակը, թե այս պահին ինչ փուլում է գտնվում, Դոխոյանը վստահեցրեց, որ օրեցօր ավելանում է շարժմանը միացած քաղաքացիների թիվը. «Այս պահին մենք շարունակում ենք մեր երթերը, մեր խաղաղ անհնազադության ակցիաները, եւ կարծում եմ, որ առաջիկայում մենք կունենանք շրջադարձային պրոցեսներ»:
Կարդացեք նաև
Հիշեցնենք, որ օրեր առաջ Վահե Դոխոյանը կրկին բերման էր ենթարկվել, որի վերաբերյալ իր ֆեյսբուքյան էջում գրառում էր կատարել. «Ապօրինի բերման ենթարկվեցինք, ուղղությունը դեպի Կոտայքի մարզ։ Խաղաղ երթի ժամանակ… Աբովյան քաղաք, ստեղ էլ տեղ ու դադար չկա: Առաջին անգամ եմ Աբովյանում, երկար կհիշեմ»:
Տաթեւիկ ՂԱԶԱՐՅԱՆ
Լուսանկարները՝ Վահե Դոխոյանի ֆեյսբուքյան էջի
