ՀՀ գլխավոր դատախազ Արթուր Դավթյանն ԱԺ-ում անդրադառնալով պաշտոնյաներին և հասարակական գործիչներին հասցեագրված ծանր վիրավորանքն ու զրպարտանքը քրեականացնելուն՝ ասել էր․ «Ես շատ ուրախությամբ այս հարցի քննարկմանը տարբեր միջազգային գործընկերների, դեսպանների հետ հանդիպմանն ասում եմ` խնդրում եմ բացեք, մինչև օգոստոս ամիսը նայեք մեր հրապարակային խոսքի որակը և, օրինակ, էսօր: Ակնհայտորեն տարբերություն մենք ունենք»:
Երեւանի մամուլի ակումբի նախագահ Բորիս Նավասարդյանն «Առավոտի» «Առերեսում» հաղորդաշարի ընթացքում պատասխանելով հարցին, թե արդյոք այդ օրենքն իրոք զսպող, սառեցնող ազդեցություն է ունեցել սոցիալական ցանցերում հայհոյախոսությունը նվազեցնելու վրա՝ ասաց․ «Մեր կազմակերպությունը բավական հաճախ իրականացնում է տարբեր տեսակի մշտադիտարկումներ։ Եվ ցավոք, մենք չենք կարող համաձայնել այդ գնահատականին, թե ինչ որ դրական ազդեցություն է ունեցել Քրեական օրենսգրքում այս փոփոխությունը ընդհանուր տեղեկատվական միջավայրում»։ Հավելեց, թե այն առավել պայմանավորված է քաղաքական անցուդարձի փոփոխությամբ․ «Երբ որ սրվում է քաղաքական իրավիճակը՝ բոլորը մոռանում են օրենսդրական բոլոր սահմանափակումների մասին եւ անում են այն, ինչ ձեռնտու եւ համահունչ է քաղաքական շահերին»։
Ինֆորմացիայի ազատության կենտրոնի ղեկավար Շուշան Դոյդոյանն էլ հայտնեց, որ ԵԽԽՎ ներկայացուցիչները երբ Հայաստանում էին՝ «Պաշտոնյաները խոստացել են, որ սա ժամանակավոր կարգավորում է՝ ընդամենը 2-3 տարով են ընդունել․․․ Սա էլ է նշանակում, որ սա կարճատես ու կարճամիտ լուծում է»։
«Բայց կախված է քաղաքական անցուդարձից՝ եթե պետք լինի, երկար կպահեն»,– կանխատեսեց Բորիս Նավասարդյանը։
Կարդացեք նաև
Շուշան Դոյդոյանի եւ Բորիս Նավասարդյանի «Առերեսումը» դիտեք այսօր 22.00–ին
Աննա ԻՍՐԱՅԵԼՅԱՆ
