Ըստ արդարադատության փոխնախարարի՝ նախագծով նախատեսվում է, որ այլեւս չեն լինելու խորհրդային տարիներից եկած, արհեստականորեն բաժանված ուղղիչ հիմնարկների տեսակները: Ազգային ժողովի պետաիրավական հարցերի մշտական հանձնաժողովը հավանություն է տվել ՀՀ քրեակատարողական նոր օրենսգրքի նախագծին, որով սահմանվում է, որ չեն լինի բաց, կիսաբաց, կիսափակ, փակ եւ բուժական ուղղիչ հիմնարկներ, կլինեն երեք հիմնական գոտիներ՝ ցածր անվտանգության գոտի, միջին անվտանգության գոտի եւ բարձր ռիսկայնության անվտանգության գոտի: ՀՀ արդարադատության նախարարի տեղակալ Արփինե Սարգսյանը նախագիծը ներկայացնելիս ասաց. «Ամբողջ օրենսգիրքը կառուցված է այն տրամաբանության վրա, որ յուրաքանչյուր դատապարտյալ պետք է ունենա պատժի կրման անհատականացված պլանավորում»: Նշվեց, որ կարանտինային բաժանմունքից սկսած՝ դատապարտյալի հետ զբաղվող աշխատանքներում ներգրավվելու է վերասոցիալականացման հանձնաժողով:
«Դատապարտյալի համար պետք է պարզ լինի, թե քրեակատարողական հիմնարկն իր վրա ինչպիսի ներգործություն պետք է ունենա, որպեսզի արդյունքում չունենանք կրկնահանցագործության ռիսկեր»,- ասաց փոխնախարարը: Ըստ նրա, եթե անձը 5 տարի ժամկետով է պատիժը կրելու քրեակատարողական հիմնարկում, պետք է հստակեցվի, թե 5 տարվա ընթացքում նախնական պլանավորմամբ ինչպիսի աշխատանք է հիմնարկը նրա հետ կատարում, ինչպիսի ռեսուրս է պետք ներդրվի դատապարտյալի վերասոցիալականացման աշխատանքներում:
Ինչ վերաբերում է անհատական պլանավորման գաղափարին՝ նա ասաց. «Եթե, ենթադրենք, պատժի կրման շրջանակում անձը լավ վարքագիծ է դրսեւորում, անհատական մակարդակով այդ լավ վարքագիծը հաշվի առնելով՝ նրա իրավունքների ծավալը շատ ավելի մեծ է լինում, քան այն դատապարտյալների մոտ, որոնք, օրինակ, դրսեւորում են բացասական վարքագիծ»: Ըստ փոխնախարարի՝ նոր նախագծով «ուղղիչ հիմնարկ» եզրույթը չի օգտագործվելու: Օրենսգրքով հստակ սահմանված է բժշկական օգնությանն ու սպասարկմանն առնչվող երաշխիքները դատապարտյալի համար: Առանձին կետով նաեւ անդրադարձ է կատարվում խոշտանգման կամ վատ վերաբերմունքի այլ դրսեւորումների դեպքերի արձանագրմանը:
Ռուզան ՄԻՆԱՍՅԱՆ
Կարդացեք նաև
«Առավոտ» օրաթերթ
19.05.2022
