«Սովորական մարդկանց անսովոր պատմությունները». պիեսների ընթերցումներն «Արմմոնո 2022» մոնոներկայացումների միջազգային թատերական փառատոնի շրջանակում այս խորագիրն է կրում։ Փառատոնն անցկացվում է արդեն 20 տարի շարունակ:
Այսօր Սոս Սարգսյանի անվան Համազգային պետական թատրոնի փորձասենյակում երիտասարդ դերասաններ Սարգիս Շողունցն ու Հարութ Բեգ-Վանյանն ընթերցեցին փառատոնի շրջանակներում ընդգրկված երկու պիես:
Սամվել Կոսյանի «Խաղ առանց կանոնների» պիեսի հերոսը ինքնահաստատման լավագույն միջոց է համարում փողն ու հարստությունը: Սակայն, իր կարողությունները գնահատելով, ընտրում է հարստանալու ամենաանտրամաբանական ու ամենաանհեռատես տարբերակը՝ մեկ միլիոն դոլար գտնել: Մեկ միլիոնի լուրը զարմանալի արագությամբ տարածվում և իրարանցում է առաջացնում մտերիմների ու ընկերների միջավայրում, որոնցից յուրաքանչյուրը ձգտում է միլիոնից մի բան էլ ինքը պոկել: Հերոսը շռայլ է, չի մերժում: Սկսվում է փնտրտուքի շրջանը, որն ուղեկցվում է նրա համար անսպասելի տհաճ իրադարձություններով, ինչն ստիպում է հրաժարվել սեփական մտահղացումից: Ո՞ր խելագարը միլիոն կկորցնի: Սակայն անկանխատեսելի են հիմարության հետևանքները: Որքան էլ փորձում է ընկերներին ու մտերիմներին համոզել, որ միլիոնի պատմությունը խաղ էր և ինքը հրաժարվել է խաղը շարունակել, միևնույն է, իրենց գումարները ստանալու նրանց հետապնդումները շարունակվում են:
Կարդացեք նաև
Սարգիս Շողունցը դերասանի զգայական փորձառությամբ նոր շունչ տվեց պիեսին և հետաքրքիր ձևով մատուցեց:
Իսկ Արշակ Սեմիրջյանի «Հակաբջիջ» պիեսը, որպես այլաբանություն, խտացված է հերոսի՝ գրականության նախկին ուսուցիչ, այժմ կոշկակար Մլեի մեջ: Շուրջբոլորը բջիջներ են, որոնք երկիրը կրծում են ինչպես ներսից, այնպես էլ՝ դրսից: Մլեն միայնակ դուրս է գալիս պայքարելու արատավոր բարքերի դեմ: Օտարամլության ախտով է տառապում նաև հերոսի որդին, որն ընտանիքով ապրում է այլ երկրում և ամեն բան անում է հորն իր մոտ տանելու համար, իր խոսքերով ասած՝ որպեսզի դուրս բերի այդ ճահճից: Հերոսն անդրդվելի է իր որոշման մեջ, և նրա յուրօրինակ կռվանն այստեղ նրա արհեստանոցի պատին փակցված Տիգրան Մեծի նկարն է, որի հետ անընդհատ բանավիճում է:
Դերասան Հարութ Բեգ-Վանյանը պիեսը մատուցեց յուրատիպ տեմպառիթմով, ինքնատիպ արտահայտչականությամբ:
Ընթերցումների վերջում «Արմմոնո» փառատոնի տնօրեն Մարիաննա Մխիթարյանը շնորհակալություն հայտնեց երիտասարդ դերասաններին և պիեսների հեղինակներին, ինչպես նաև սիրված դերասանուհի Տաթև Ղազարյանին՝ օժանդակելու համար:
Նշենք, որ փառատոնի փակումը տեղի կունենա մայիսի 21-ին ՀԹԳՄ-ում:
Պատրաստեց Վովա ԱՐԶՈՒՄԱՆՅԱՆԸ
Լուսանկարները` հեղինակի:
