«Հրազդան» մարզադաշտի մոտ, քիչ առաջ, ոստիկանությունը փորձեց բերման ենթարկել մեր այն հայրենակցին, ով ավտոբուսի վրա էր բարձրացել եւ եռագույնն էր ծածանում: Ասում էին… չգիտեմ, դուրները չէր եկել, մի խոսքով»,-«Դիմադրության» շարժման երթի ժամանակ, արդեն «Հաղթանակ» կամրջի մոտ, ֆեյսբուքյան ուղիղ եթերում ոստիկանների եւ ցուցարարների քաշքշոցի մասին պատմեց երթը գլխավորող ՀՀ երկրորդ նախագահի որդին՝ Լեւոն Քոչարյանը:
Նա տեղեկացրեց, որ ցուցարարները թույլ չեն տվել եռագույն դրոշը պարզած երիտասարդին ոստիկանները բերման ենթարկեն, փոխարենը, ոստիկանները բերման են ենթարկել մեկ այլ երիտասարդի՝ «պատահական, իրենց հանգստության համար. մի ամբողջ ավտոբուս հիմա այդ տղային է տանում»:
Լեւոն Քոչարյանը նաեւ պատմեց, որ ոստիկաններն արդեն «Հաղթանակ» կամրջի մոտ սադրանք են կազմակերպել. «Կարմիր բերետավորների մեքենաներից մեկն եկավ, կանգնեց, միջից դեմքի ցինիկ արտահայտությամբ դուրս եկավ այն ոստիկանը, որը երեկ, տեսանյութը ես դրել էի , մատներով սեղմում էր մեր ընկերներից մեկի քներակը: Հեռվից-հեռու ուզում էինք հասկանալ՝ ի՞նքն է, թե՞ ոչ, հարցնում ենք՝ դու էի՞ր, ասում է՝ հա-հա, ու երկուսով մեր կողքով քայլում են: Ոնց որ հատուկ, ինչ-որ մեկի նյարդերը չդիմանա, գնա մի հատ խփի կամ մի բանով տա գլխին, ինչին, իրականում ինքն արժանի է, բայց որը մենք մեզ, իհարկե, թույլ չենք տալիս: Այդ տղան էլ՝ Գեւորգը, ում քներակը որ սեղմել էին, իմիջիայլոց, մեզ հետ է»: Լեւոն Քոչարյանը մանրամասնեց, որ ոստիկանության ղեկավարներին հորդորել են՝ հեռացնել այդ ոստիկանին տարածքից, սակայն, չեն հեռացրել, ինչից ինքը եզրակացնում է, որ ոստիկանությունում ողջունում են նման բաները:
«Կաբինետներում գնում են հանդիպման, իրենց փորձում են հավաստիացնել՝ այսպես չի, այնպես չի, ծառայողական քննություն, բլա-բլա, բայց իրականում այսպես է»,- ասաց Լեւոն Քոչարյանը՝ հավելելով, որ պրիմիտիվ սադրանքների չեն տրվելու, եւ, որ պետք է հաղթել նաեւ կազմակերպվածությամբ եւ անելիքները լավ իմանալով:
Կարդացեք նաև
Նելլի ԳՐԻԳՈՐՅԱՆ
