«Գաղտնիության ռեժիմը տարածվում է ուսումնասիրության փուլի վրա, այսինքն՝ այն դեպքերի վրա, երբ ուսումնասիրությունը դեռ ավարտված չէ։ Այդպիսիք մեր վարույթում այս պահին մոտ 300-ն են»,-ԱԺ պետաիրավական հարցերի հանձնաժողովի նիստում այսօր անդրադառնալով հարցին, թե ապօրինի ծագման գույքի բռնագանձմանն առնչվող քանի գործ է քննվում՝ ասաց ՀՀ գլխավոր դատախազի տեղակալ Սրբուհի Գալյանը։
«Ինչ վերաբերում է ավարտված ուսումնասիրություններին, ապա դրանց թիվը քսանն է։ Ութ դեպքում արդեն իսկ դատարան են ներկայացվել հայցադիմումներ, ընդունվել են վարույթ։ Սա նշանակում է, որ անունները եւ գործերի մանրամասները հասանելի են հանրությանը։ Դրանք տեղադրվելու են համապատասխան կայքերում, իսկ նիստերը լինելու են հրապարակային։ 20 հայցերի պարագայում դատարանների կողմից կիրառված են հայցերի ապահովման նախնական միջոցներ, այսինքն՝ այդ անձանց գույքն արգելադրված է։ Մամուլում նրանցից շատերի անունները շրջանառվել են»,-նշեց Սրբուհի Գալյանը։
Նա հավելեց, որ իրենց կանխատեսումներով՝ առաջիկա ամիսներին քսանից ավելի հայցադիմումներ մուտք կարվեն դատարաններ․ «Զուգահեռ աշխատում ենք հաշտության համաձայնությունների շուրջ։ Որոշ գործերով ունենք ընթացիկ բանակցություններ»։
Լուիզա ՍՈՒՔԻԱՍՅԱՆ
