«Որ գալիս էիք, այդ պահին Երեւանում ի՞նչ վիճակ էր։ Քաղաքը պարալիզացվա՞ծ է, թե ոչ, ինչպես պարոն Սաղաթելյանն էր խոստանում։ Պարալիզացման իմաստը մեզ այդպես էլ չի բացատրվել, եթե վերաբերում է երկրի անվտանգությանը»,-ԱԺ պաշտպանության եւ անվտանգության հարցերի հանձնաժողովի այսօրվա նիստում, դիմելով փոխոստիկանապետ Արա Ֆիդանյանին (լուսանկարում), հարցրեց հանձնաժողովի նախագահ, ՔՊ խմբակցության պատգամավոր Անդրանիկ Քոչարյանը։
«Ոչ քաղաքը, ոչ որեւէ պետական կառույց պարալիզացված չէ։ Ոստիկանությունը հստակ իրականացնում է իր գործառույթները։ Պատվով պետք է նշեմ, որ մինչեւ օրս իրականացված բոլոր գործողությունների զգալի մասն արվել է օրենքի շրջանակում»,-պատասխանեց Արա Ֆիդանյանը։
Նա նշեց․ «Մոտ քսան օր է, ինչ գործողություններ են, սակայն ոստիկանության կողմից գեթ մեկ անգամ չի կիրառվել որեւէ հատուկ միջոց, բացառությամբ մեկ դեպքի, այն էլ հատուկ միջոցները եղել են վահաններ։ Պարբերաբար որոշ անձինք փորձում են ներկայացնել, թե ոստիկանությունն անհամաչափ ուժ է կիրառում»։
Անդրանիկ Քոչարյանն էլ իր հերթին փաստեց, որ հանձնաժողովի անդամները քաղաքի տարբեր հատվածներից այսօր հասել են նիստի․ «Չկան ընդդիմադիր գործընկերները, որոնք այդպես էլ պարզ չէ, թե քաղաքի որ հատվածում ինչ խնդիր են լուծում։ Խցանում ստեղծողներն էլ են իրենք, խցանման մեջ մնացողներն էլ։ Պետությունն իր առաջ դրված խնդիրները կատարելով գնում է առաջ»։
Կարդացեք նաև
Քոչարյանը հետաքրքրվեց նաեւ Ֆրանսիայի հրապարակում վրաններից մեկում մահացած քաղաքացու մասին։ «Այո, սրտի կանգը վրա է հասել գերդոզավորման արդյունքում»,-հաստատեց Արա Ֆիդանյանը, ինչից հետո Քոչարյանը հավելեց․ «Այստեղ անելիք ունեն պատկան կառույցները, որովհետեւ փակ տարածքներում, եթե նման կոնտինգենտ է հայտնվում, դա վտանգ է երիտասարդ սերնդի համար, որոնք ներգրավված են այս քաղաքական գործընթացներում»։
Լուիզա ՍՈՒՔԻԱՍՅԱՆ
