Ֆրանսիայի հրապարակում Դիմադրության շարժման հանրահավաքի ընթացքում Արցախյան 44-օրյա պատերազմում զոհված տղաների հարազատները հարթակից պահանջեցին ՀՀ բարձրագույն դատական խորհրդի նախագահի պաշտոնակատար Գագիկ Ջհանգիրյանի հրաժարականը։
Նաև տեղեկացրին, որ վաղը՝ ժամը 11-ին լինելու են Բաբայան 6 հասցեում՝ ՀՀ քննչական կոմիտեի զինվորական քննչական գլխավոր վարչությունում՝ պարզաբանում ստանալու քննիչի անգործության մասին։ 44-օրյա պատերազմում զոհված զինծառայողների հարազատների ներկայացուցիչները վրդովված են, որ ՀՀ վարչապետ Նիկոլ Փաշինյանին որպես մեղադրյալ ներգրավելու միջնորդությունը հետաձգվել է։
Հիշեցնենք, որ այսօր ՀՀ գլխավոր դատախազությունը տեղեկատվություն է տարածել՝ նշելով, որ Նիկոլ Փաշինյանի կողմից հանցանք կատարելու մասին տվյալները հիմնված են հանգամանքների վրա, որոնք ենթակա են ստուգման:
5165 շարժման հիմնադիր Կարին Տոնոյանը, դիմելով դատավորներին ու դատախազներին, ասաց․ «Խոսքս ուղղում եմ հատկապես գլխավոր դատախազին։ Եթե այս զգայուն, չափազանց կարևոր գործով ՀՀ-ում չեղավ արդարադատություն, չեմ հավատում, որ որևէ այլ գործով Հայաստանում կլինի արդարադատություն։ Եթե հինգ հազար սպանված տղաների գործը ձեզ չի հուզում, և դուք ընդունակ եք այդպես անբարո վերաբերվել այս գործին, ուրեմն դուք իրավունք չունեք որևէ այլ դատավարություն իրականացնելու և մոտենալու արդարադատությանը։ Հայաստանում մենք՝ ծնողներս կիրացնենք դատ ու արդարադատություն»։
Կարդացեք նաև
Տաթև ՀԱՐՈՒԹՅՈՒՆՅԱՆ
