Հավաքական անվտանգության պայմանագրի կազմակերպության (ՀԱՊԿ) անդամ երկրների գագաթնաժողովի ավարտին այսօր «Շանթ» հ/ը-ն ՀԱՊԿ գլխավոր քարտուղար Ստանիսլավ Զասի ճեպազրույցի ժամանակ հետաքրքրվեց, թե ՀԱԿՊ-ում ինչ կարծիքի են այսօր ՀՀ վարչապետ Նիկոլ Փաշինյանի բարձրաձայնած խնդրի մասին։ Հիշեցնենք՝ գագաթնաժողովում Փաշինյանն այսօր այդ թվում փաստել էր, որ Ադրբեջանի՝ ՀՀ տարածք ներխուժմանը ՀԱՊԿ-ը չարձագանքեց այնպես, ինչպես ՀՀ-ն էր ակնկալում։
Ստանիսլավ Զասը նախ նշեց․ «Այո, հարցը քննարկվել է։ Շատ առաջարկներ են արվել՝ ճգնաժամային արձագանքման համակարգի կատարելագործման համար։ Այդ թվում ՀՀ վարչապետն է առաջարկներ արտահայտել։ Առաջարկներ են ներկայացրել նաեւ այլ անդամ-երկրների ղեկավարներ՝ հաշվի առնելով Ղազախստանում կատարվածի հիման վրա փորձը։ Ընդհանուր առմամբ ուզում եմ ասել, որ համակարգն աշխատել է։ Այո, որոշ խնդիրներ կային, որոնք պետք է հաղթահարել։ Հիմա խնդիր է դրված ներդնել որոշակի կորեկցիաներ, որոնք թույլ կտան խնդիրը լուծել այդ թվում Ղազախստանում։ Հետեւություններ, միանշանակ, արվել են»։
Լուիզա ՍՈՒՔԻԱՍՅԱՆ
