«Ներկայացրել ենք պահանջ, որպեսզի երրորդ գոտին ազատեն, բաց պահեն մյուս քաղաքացիների ազատ տեղաշարժի համար: Բոլորը շատ նորմալ ենթարկվում էին ոստիկանի օրինական պահանջին, ազատում էին երրորդ գիծը, բայց մեքենաներից մեկը հորդորների էր ենթարկվում»,- այսօր այս պատճառաբանությամբ ու հիմնավորմամբ ոստիկանները կանգնեցրել էին «Դիմադրության» շարժման ավտոերթին մասնակցող վարորդներին՝ ավելի կաթվածահար անելով երթեւեկությունը:
Վարորդն էլ արդարանում էր. «Ոնց կարող եք ապացուցել՝ ես օրինական պահանջին ենթարկվե՞լ եմ, թե՝ չէ, աջ եմ քաշել, կանգնել եմ»: Ըստ ոստիկանի, հարկադրված է կանգնել, քանի որ ոստիկանները փակել են ճանապարհը:
Հաղթանակ կամրջի մոտ ոստիկանները կանգնեցրին ու բերման ենթարկեցին «Հայրենիք կուսակցության աջակիցներին: Բերման ենթարկվածների թվում էր նաեւ ԱԱԾ նախկին մամուլի խոսնակ Սամսոն Գալստյանը:
Ոստիկանները հայտարարեցին՝ ով խոչընդոտում է ոստիկաների գործողություններին, նրան էլ ենք տանելու բաժին ու սկսեցին բոլոր վարորդներին բերման ենթարկել: 15-ից ավելի կարմիր բերետավորներով միայն մեկ վարորդի դեմ էին պայքարում՝ նրան բռնի ուժով տեղափոխելու համար:
Կարդացեք նաև
Աճառյան փողոցից դեպի Մյասնիկյան պողոտա հատվածում ոստիկանը արձանագրեց, որ ավտոերթի մասնակիցներից մեկի մեքենայի հետեւի համարները եռագույն դրոշով փակված էին: Ցուցարարներն էլ հորդորում էին քամուն տուգանել, քանի որ ըստ նրանց, քամին էր դրոշը բերել, փակել:
Լրագրողների հարցին՝ հիմա դուք քամուն ենթարկելո՞ւ եք պատասխանատվության, ոստիկանը պատասխանեց. «Լո՞ւրջ եք հարցնում, եթե դուք կարաք քամու հետ հարցազրույց անեք, ես կենթարկեմ պատասխանատվության: Գնացեք քամուց հարցազրույց վերցրեք»: Ցուցարարները վիճում էին, թե՝ «դրոշից է հավանաբար, եթե Ադրբեջանի դրոշը լիներ, այդպես չէին անի»:
Ի վերջո՝ ոստիկանները տեղեկացրին, որ մեքենայի պետհամարանիշները փակելու համար նախատեսված է տուգանք 25 հազար դրամ: Վարորդը ակտի տակ չստորագրեց՝ ասելով, որ բողոքարկելու է:
Հռիփսիմե ՋԵԲԵՋՅԱՆ
