Այսօր Ծիծեռնակաբերդի խճուղու հատվածում «Դիմադրության» շարժման ավտոերթին մասնակցող վարորդներին ոստիկանները մեկ առ մեկ կանգնացնում ու բռնի ուժով դուրս էին հանում մեքենաներից:
Տասնյակ կարմիր բերետավորներ մեկ վարորդի թեւը մտնելով՝ բռնի ուժով տանում էին ոստիկանական մեքենաներ: Նրանցից մեկն էլ նստում էր քաղաքացու մեքենան ու վարելով՝ դուրս բերում ճանապարհի երթեւեկելի մասից: «Դու ի՞նչ գործ ունես իմ մեքենայի հետ, սա իմ սեփական մեքենան է»,- բողոքում էին վարորդները:
Մի վարորդ դուռ ու պատուհան փակել, նստել էր մեքենայի մեջ, կարմիր բերետավորները սկսեցին հարվածել մեքենայի պատուհաններին ու դռներին՝ հորդորելով բացել: Ի վերջո սկսեց մեքենան վարել, ոստիկաններն էլ վազում էին ճողոպրող մեքենայի հետեւից:
Կարդացեք նաև
Զավեշտալի էր, որ ցուցարար վարորդներին բռնի ուժով տարել էին ոստիկանական այն գազելի մեջ, որն անսարք վիճակում էր ու մեքենայի առաջամասից ծուխ էր դուրս գալիս:
Ստիպված վարորդներին սկեցին այս անգամ կրկին բռնի ուժ կիրառելով տեղափոխել ոստիկանական այլ մեքենաներ: Մեծահասակ վարորդներից մեկը փորձում էր պոկել ոստիկանի ուսադիրները, նա բարկացած էր ոստիկաններից մեկի պահվածքից, ասում էր. «Դու պատասխան կտաս քո խփելու համար, ես քո դեմքը հիշելու եմ»: Ոստիկաններն էլ փորձում էին «հոպար, հանգիստ» դիմելաձեւով հանգստացնել:
Մեկ այլ փոքրամարմին վարորդի ոստիկաններից մեկը, դուրս բերելով մեքենայից, պարզապես գրկեց ու այդպես գրկած տարավ ոստիկանական մեքենայի մոտ:
Հռիփսիմե ՋԵԲԵՋՅԱՆ
