«Մինչեւ 2018 թվականի իշխանափոխությունը մենք ունեինք աշխարհի առջեւ հասկանալի, ներկայանալի եւ ընդունելի արտաքին հարաբերություններ։ 2018-ի 2-րդ կեսից դիլետանտից կապիտուլյանտի վերածված իշխանությունը սկսեց աղավաղել մեր արտաքին հարաբերությունները»,-այս մասին այսօր Ֆրանսիայի հրապարակում մեկնարկած «Դիմադրություն» շարժման հանրահավաքին ասաց ՀՀ պաշտպանության նախկին փոխնախարար, ՀՀԿ ԳՄ անդամ Արտակ Զաքարյանը։
Նա ասաց, որ խաղաղության օրակարգի անվան տակ իշխանությունները մեր երկիրը դուրս են բերել աշխարհաքաղաքական աճուրդի, որտեղ չկա հայկական շահը, որտեղ Հայաստանը կրկին գլորվում է դեպի օտար շահերի համար հնարավոր հաջորդ պատերազմ։
Զաքարյանը, խոսելով իշխանափոխությունից հետո ծրագրերի մասին, ասաց՝ միջազգային կառույցներում ՀՀ արտաքին գործերի նախարարության, հայկական սփյուռքի, այլ պետական մարմինների գործունեության արդյունքում հակամարտության համապարփակ լուծման նպատակով պետք է հասնել Արցախի ամբողջականացմանն ու Ադրբեջանից դուրս կարգավիճակի հարցի քննարկմանը, Արցախի անվտանգությունն ապահովելու նպատակով ՀՀ-ն պետք է աջակցի ռուս խաղաղապահների երկարաժամկետ ներկայությունն Արցախում՝ հասնելով նրանց ԵԱՀԿ ներկայացուցչական կարգավիճակի հաստատմանը։
Կարդացեք նաև
Ըստ Զաքարյանի ներկայացրած ծրագրի, ազգային անվտանգության նոր ռազմավարության հիմքում պետք է դրվեն արտաքին քաղաքականության եւ դիվանագիտական ջանքերի միջոցով Հայաստանի եւ Արցախի շուրջ անվտանգային կայուն եւ երկարատեւ խաղաղության գաղափարներն Արցախի բնակչության ինքնորոշման իրավունքի պարտադիր կիրառման միջոցով․ «Հայաստան-Ռուսաստան երկկողմ համագործակցության օրակարգի բոլոր ուղղություններով՝ ռազմաքաղաքական, տնտեսական, էներգետիկ, տրանսպորտային, հումանիտար, մշակութային ոլորտներում Հայաստանը պետք է վերականգնի եւ ընդլայնի ՌԴ-ի հետ դաշնակցային հարաբերություններն ու ռազմավարական գործընկերությունը»։
Նա նշեց՝ Հայաստանում ժողովրդավարությունն այլընտրանք չունի․ «Բայց այնպիսի ժողովրդավարությունը, որը չի սպառնում վերածվել մեկ անձի դիկտատուրայի, որը չի կալանավորում խաղաղ բողոքի ցույցեր իրականացնող քաղաքացիներին»։
Նելլի ԲԱԲԱՅԱՆ
