«Հաջորդ կառավարությունը, 250 անձինք չեն ձեւավորվելու բացառապես կուսակցական քվոտաներով։ Լինելու են այն քաղաքական ուժերի ներկայացուցիչները, որոնք այս պայքարի ընթացքում եւ այս հարթակում են, եւ դրանից դուրս»,-լրագրողների հետ հանդիպմանն այսօր հայտարարեց «Հայաստան» խմբակցության պատգամավոր Իշխան Սաղաթելյանը՝ անդրադառնալով հարցին, թե ովքեր են իշխանության հեռացումից հետո կառավարման նոր համակարգում ընդգրկվել պատրաստվող 250 անձինք, որոնց մասին ավելի վաղ հայտարարվեց։
«Շատ մեծ կարեւորություն ենք տալիս ներուժ, փորձ, գիտելիք ունեցող անձանց՝ ոչ միայն այն քաղաքական դեմքերին, որոնց ճանաչում եք, այլեւ բազմաթիվ անկուսակցականների, որոնք ունեն ներուժ։ Խորհրդակցություններ չենք արել այն անձանց հետ, ում պատկերացնում ենք, որովհետեւ դեռ այդ փուլում չենք։ Լավագույն հավաքականն ենք ստեղծելու, որը հավաքական պատասխանատվություն կստանձնի՝ երկիրն այս վիճակից դուրս բերելու»,-նշեց Իշխան Սաղաթելյանը։
Նրա խոսքով՝ դիմադրության շարժման հարթակը համազգային է եւ վերկուսակցական, եւ ապագա՝ նոր իշխանությունը պետք է դա արտացոլի, իսկ գործող իշխանությունը չի կարեւորում մարդկանց փորձն ու գիտելիքները․ «Կարեւորը՝ իրենցից լինի։ Մի հատ նայեք՝ ում է նշանակել Վանաձորի քաղաքապետի պաշտոնակատար։ Մի հատ այդ մարդու անցյալը նայեք, մինչդեռ վանաձորցին ընտրել էր քաղաքապետ, որին կալանավորեցին»։
Հարցին՝ «դուք հայտարարել եք, որ հաջորդ իշխանությունում նրանք, ովքեր տարիներ շարունակ հարստահարել են, օդիոզ դեմքեր են, տեղ չեն ունենալու․ ձեր դաշինքում կա՞ն նման մարդիկ», Իշխան Սաղաթելյանը պատասխանեց․ «Երբեմն լինում են մարդիկ, որոնք իրենց գործունեության ընթացքում աչքի են ընկել հանրության համար անընդունելի դրսեւորումներով։ Նման մարդիկ կան տարբեր կուսակցություններում եւ դաշինքներում։ Մենք որեւէ մեկին անձնական հրավերով այս հրապարակ չենք բերել եւ չենք էլ արգելել։ Բայց ասում ենք, որ հաջորդ իշխանության մեջ նման մարդիկ դեր չեն չունենալու, արտոնյալ կարգավիճակ չեն ունենալու։ Սրանով հարցը փակված է»։
Կարդացեք նաև
Լուիզա ՍՈՒՔԻԱՍՅԱՆ
