Ոստիկանության՝ օրենքի սահմանազանցումներն ունեն պետական աջակցություն։ Այս մասին այսօր Ֆրանսիայի հրապարակում մասնագիտական քննարկման ժամանակ հայտարարեց փաստաբան Րաֆֆի Ասլանյանը՝ միաժամանակ փաստելով, որ քաղաքական ընդդիմության գործողությունների արդյունքում կան շատ ձերբակալված, կալանավորված անձինք։
«Անմեղության կանխավարկածից ելնելով՝ որեւէ մեկի մեղավորությունն իրավունք չունենք կասկածի տակ դնել, սակայն զուգահեռ որեւէ ոստիկան պատասխանատվության չի ենթարկվում, էլ չասենք՝ արարքներին տրվող գնահատականների մասին»,-նկատեց նա։
Րաֆֆի Ասլանյանը հավելեց․ «Որքանով ես եմ տեղեկացված՝ այս պահին որեւէ ոստիկան քրեական հետապնդման տիրույթում չի գտնվում։ Համացանցում առկա տեսանյութերից ակնհայտ է, որ շատ դեպքերում ոստիկանության աշխատողների գործողությունները պարունակում են հանցակազմի հատկանիշներ։ Առնվազն քրեական գործեր հարուցելու բավարար հիմքեր կան, բայց պետական ապարատն ու իրավապահները ոչինչ չեն անում։ Սա ողջամիտ կարծիք է ձեւավորում, որ ոստիկանությունն ունի պետության աջակցությունը, եւ նման գործողությունները կատարվում են հանձնարարությունների արդյունքում։ Իսկ հանձնարարողը պատասխանատվության չի ենթարկվի։ Նման դեպքում ժողովրդավարության արժեքների մասին խոսելն անիմաստ է»։
Լուիզա ՍՈՒՔԻԱՍՅԱՆ
