Այսօր Գյումրիում էր Հայաստանում Եվրամիության դեսպան Անդրեա Վիկտորինը, որը մասնակցեց «Թումո» ստեղծարար տեխնոլոգիաների կենտրոնում Ընտանիքի միջազգային օրվան նվիրված համաժողովին:
Դեսպանն ասաց, որ բացի Ընտանիքի տոնից, նաև Եվրոպայի օրը պիտի նշվի հենց Գյումրիում։
«Ինչո՞ւ հենց Գյումրիում, այստեղ գաղտնիք չկա, բավական երկարատև հարաբերություններ ենք ունեցել և ես ինքս սիրահարված եմ Գյումրիին և Շիրակի մարզին։ Այն խորհրդանշում է Եվրամիության և Հայաստանի միջև եղած երկարատև հարաբերությունները»,- ասաց Անդրեա Վիկտորինը ։
Դեսպանն անդրադարձավ նաև Ընտանիքի միջազգային տոնին՝ նշելով, որ բոլոր երեխաները պիտի ապրեն անվտանգ միջավայրում, կարողանան կրթվել ու ապագան ձևավորելու հնարավորություն ունենան։ Ըստ դեսպանի, հատուկ հաստատություններից երեխաներին պիտի ընտանիք վերադարձնել, քանի որ ամենալավ կառույցը ընտանիքն է։
Կարդացեք նաև
«Մի գաղտնիք էլ բացեմ, մեքենայի մեջ թեժ քննարկում ենք ունեցել երկու մայրերի հետ, որոնք ինձ ուղեկցում էին։ Քննարկում էինք, թե ինչպես է պետք պաշտպանել մեր աղջիկներին, որպեսզի նրանք հնարավորություն ունենան ապագայում ընտրել իրենց ճանապարհը։ Եթե խոսում ենք ընտանիքիների մասին, առաջին հերթին պիտի խոսենք ծնողների մասին։
Ծնողների համար շատ բարդ առաջադրանք է ուղղորդել երեխային դեպի ճիշտ ապագա, հաղորդել այն արժեքները, որոնցով որ կցանկանանք երեխան օժտված լինի, բայց միաժամանակ տանք նրանց ազատություն, որպեսզի սխալներ անեն և այդ սխալներից սովորեն։ Եվ դառնան անկախ չափահասներ, որոնք ի վիճակի են ընտրել իրենց ճանապարհը։
Ընտանիքը երեխայի զարգացման օրրան է, և ամենալավ կառույցը, որտեղ կարող է այդ զարգացումը տեղի ունենալ, ընտանիքն է, ընտանիքում աշխատում են լավագույն սոցիալական աշխատողները», -ասաց դեսպանը։
Ընտանիքի միջազգային օրվան նվիրված համաժողովին ներկայացվեց Եվրամիության կողմից ֆինանսավորվող «Ընտանեկան միջավայր և համայնքային ծառայություններ Հայաստանի երեխաների համար» ծրագրի արդյունքները։ Այս ծրագիրն 2019թ․-ից մեկնարկել է Հայաստանի 6 մարզերում (Սյունիք, Գեղարքունիք, Տավուշ, Լոռի, Շիրակ, Կոտայք) և կարողացել են շուրջօրյա խնամքի հաստատություններից 506 երեխայի վերադարձնել ընտանիք՝ գնահատելով նրանց սոցիալական կարիքներն ու տնտեսապես հզորացնելով։
Ծրագրի ընդհանուր բյուջեն 1․500․000 եվրո է, Եվրամիության ներդրումը 1․350․000 եվրո է։ Ծրագիրն իրականացնում են «Վորլդ Վիժն Հայաստան»-ը՝ Շիրակի մարզպետարանի հետ համատեղ, «Հույսի կամուրջ»-ը և «Երեխաների աջակցության կենտրոն» հիմնադրամը։
Նունե ԱՐԵՎՇԱՏՅԱՆ
