«Սիրելի քաղծառայողներ, պետծառայողներ, հանրային ծառայողներ, վերջին 4 տարվա ընթացքում պետական կառավարման ողջ լուծը եղել է ձեր վրա: Դուք լուռ, զուսպ, բարեխիղճ կատարել եք ձեր աշխատանքը՝ հասկանալով, որ ձեզ ղեկավարում են դիլետանտները, անբանները եւ ուսապարկերը: Ամբողջ պետական համակարգը եղել է ձեր պես պրոֆեսիոնալ, կազմակերպված ու բարեխիղճ մարդկանց ուսերին: Ձեզ անընդհատ պիտակավորել են, ինչ ասես ասել են, բայց դուք, որպես պետական ծառայողներ, բարեխղճորեն ձեր բեռն առաջ եք տարել: Ժամանակն է դուրս վռնդել այդ ուսապարկերին, այլեւս չենթարկվել նրանց հրահանգներին, միանալ ժողովրդին»,- այսօր կառավարության 3-րդ մասնաշենքի մոտ, որտեղ տեղակայված են մի շարք նախարարությունները, հայտարարեց ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը:
Նա հորդորեց չենթարկվել վարչապետ Փաշինյանին, քանի որ նա չի սպասարկում հայ ժողովրդի շահերը. «Մեզ տեղեկացրեցին, որ նախարարությունից մեր արժանապատիվ հայրենակիցներից մեկը դիմում է գրել եւ ուզում է միանալ մեզ, ողջունե՛ք», – ասաց Իշխան Սաղաթելյանը: Նա հայտարարեց, որ ամբողջ պետական կառավարման համակարգը պետք է ոտքի հանեն ու երկիրը շենացնեն, բայց դրա համար պետք է հեռացնել «գլխավոր գերագույն դավաճանին»:
Հաջորդ լուրն այն է, որ ոստիկանության ծառայողներից մեկը՝ Բենո Արզումանյանը, դիմում է գրել ու միացել շարժմանը. «Ժողովուրդ ջան, հատ-հատ դիմում գրել պետք չի, միանգամից հավաքվեք, իջեք, սրանց հարցերը վերջացնենք», – ասաց Իշխան Սաղաթելյանը՝ տեղեկացնելով, որ կառավարության շենքի մուտքը, նաեւ հետնամասը ամբողջությամբ շրջափակված է:
Կարդացեք նաև
Հռիփսիմե ՋԵԲԵՋՅԱՆ
