Ինչպես հայտնել էինք, «Երիտասարդի ձայնը» քաղաքացիական նախաձեռնության անդամներն այսօր ՀՀ-ի եւ Արցախի դրոշներով, «դասադուլ» կոչերով ԵՊՀ մասնաշենքերում էին եւ ուսանողներին կոչ էին անում դուրս գալ փողոց։
Ուշագրավ է, որ լսարաններից մեկում այդ պահին դասը վարում էր 5165 շարժման անդամ, Նիկոլ Փաշինյանի հրաժարականի պահանջով դիմադրության շարժման մասնակից Մենուա Սողոմոնյանը։ «Ժողովուրդ, ձեր դասախոսն ամեն օր մեր հետ փողոցում պայքարում է։ Դուք փողոցում նրա կողքի՞ն եք»,-դիմելով ուսանողներին՝ հարցրեց նախաձեռնության անդամ Հովհաննես Հարությունյանը։
«Նիկոլը դավաճան է»,-տեղից ասաց ուսանողներից մեկը, լսարանում ծիծաղ լսվեց։ «Բա պատրաստվո՞ւմ ենք դավաճան ղեկավարին հանդուրժել։ Այս գործընթացը պետք է հասցնենք այնպիսի մակարդակի, որ ոչ միայն դու ժամը չորսին լինես Ֆրանսիայի հրապարակում, այլեւ բոլորը»,-շարունակեց Հովհաննես Հարությունյանը։
Նա նկատեց՝ նախորդ շաբաթ դասադուլ էր, ինչպե՞ս է ստացվել, որ այսօր ուսանողները եկել են դասի։ Մենուա Սողոմոնյանը պատասխանեց՝ ինքն էլ է այդպես տեղյակ եղել, հետո տեղեկացել է, որ ուսանողներն, ամեն դեպքում, գալիս են․ «Հարգելով նրանց՝ եկել եմ դասն անցկացնեմ»։
Կարդացեք նաև
Հովհաննես Հարությունը դիմեց լսարանին՝ պատրա՞ստ եք մեկ շաբաթ դասերը բաց թողնել՝ հետո բաց թողածը վերականգնելու պայմանով։ Ուսանողներից միայն մեկից համաձայնություն լսվեց։ Հովհաննես Հարությունյանը զարմացավ, որ քաղաքագիտություն սովորող ուսանողներից նման պասիվություն է նկատվում։
Ուշագրավ է, որ երբ նա փորձում էր զրույցի եզրեր գտնել, աղջիկներից երկուսն ամաչելով ծածկել էին դեմքը։ «Քո անունը ո՞նց է։ Հասմիկ ջան, այսօր 16:00-ին կգա՞ս Ֆրանսիայի հրապարակ»,-հարցրեց նա նրանցից մեկին։ «Կգամ»,-ծիծաղելով պատասխանեց ուսանող Հասմիկը ու նորից ծածկեց դեմքը։
Ամփոփելով զրույցները՝ Հովհաննես Հարությունյանը հայտնեց, որ հինգ հոգի համաձայն է գալ բողոքի ցույցի, մյուսներին էլ կոչ արեց միանալ նրանց։
Լուիզա ՍՈՒՔԻԱՍՅԱՆ
