«Կարծում եմ, որ վերին աստիճանի ճիշտ է ձեւավորված ծնողների պահանջը: Կարծում եմ, որ չէր կարելի անպատասխան թողնել այն հայտարարությունը, որը կոչված էր ալեկոծել հասարակությունը եւ ավելի մեծ սթրեսի մեջ գցել ու ուժասպառ անել հասարակությանը»,-«Հայելի» ակումբում ասաց «Ընդդեմ իրավական կամայականությունների» ՀԿ նախագահ, ՀՀ առաջին ՄԻՊ Լարիսա Ալավերդյանը՝ անդրադառնալով Նիկոլ Փաշինյանի հայտնի հայտարարությանը, որին հետեւել էին զոհվածների ծնողների գործողությունները: Նրանք գլխավոր դատախազությունից պահանջում են հարուցել քրեական գործ Նիկոլ Փաշինյանի և մի շարք պաշտոնատար անձանց դեմ, նրանց որպես մեղավոր դատական գործընթացի մեջ ներառել` առերևույթ պետական դավաճանություն իրականացնելու համար:
«Իմ սիրտը այդ ծնողների շարժման հետ է»,-ասաց տիկին Ալավերդյանը: Ինչ վերաբերում է գլխավոր դատախազության գործողություններին՝ նա դրանք կրավորական է որակում. «Կրավորական են հնչում գլխավոր դատախազության այն հայտարարությունները, թե իբր չեն կարողանում հստակեցնել` որտեղ են հանցագործության հատկանիշները: Այս կրավորական դիրքորոշման եւ ձգձգման նպատակը մեկն է` ցույց տալ, որ անպատիժ է մնալու ցանկացած հանցագործություն, որն իրականացվել է այս իշխանությունների կողմից… Հաճախ ոչ այնքան կարեւոր դեպքերում դատախազությունը գործեր է հարուցում, իսկ այս առումով, փաստորեն, գլխավոր դատախազությունը դառնում է ծանր հանցագործության մասնակից»:
Հարգելով բոլոր ծնողների վիշտը՝ միաժամանակ տիկին Ալավերդյանը չի կարողանում հասկանալ նրանց մի մասին, որոնք այսքանից հետո կանգնում են իշխանությունների կողքին. «Նրանք բարոյական առումով ծանր հարված են հասցնում իրենց զավակներին: Ունեմ նման վիճակում գտնվող ծնողների հետ 30 տարուց ավելի աշխատանքի փորձ: Ցանկանում եմ խնդրանքով հանդես գալ` ուղղված ցավի մեջ գտնվող ծնողներին՝ մի՛ դավաճանեք ձեր որդիներին, եղեք հավատարիմ, եթե զոհվել են` նրանց հիշատակին, եթե անհայտ կորած են` ստվեր մի գցեք սպասումների ձեր օրերի վրա սխալ դիրքորոշմամբ»:
Գոհար ՀԱԿՈԲՅԱՆ
