Ազգային պետության ձևավորմանն ընդառաջ
Հայության առջև ծառացած բախտորոշ մարտահրավերները հաղթահարելու համար անհրաժեշտ է հստակ հրաժարվել օտարի վերահսկողության ներքո անպատիվ գոյատևելու արատավոր կենսակերպից, և միաբանվել Հայոց պետական ինքնիշխանության ամրապնդման ու միջազգային սուբյեկտայնության վերականգնման գաղափարները կյանքի կոչելու շուրջ։
Մինչդեռ ապազգային և հակապետական համակարգը այսօր ի դեմս Փաշինյանի և իր իշխանախմբի շարունակում է թիրախավորել մեր անկախ պետականությունը և կազմաքանդել պետությունը, թշնամուն հանձնել հայկական, ներառյալ՝ Արցախ երկրամասի ազգային-պետական տարածքները, հրաժարվել Ցեղասպանության ու Հայրենազրկման հետևանքների համատեքստում պետականորեն հնարավոր հատուցում ստանալու իրավունքից, և ի վերջո շարունակում է հետևողականորեն սպասարկել Հայաստանն ու Հայությանը վերջնական և ամբողջական կապիտուլյացիայի ենթարկելու օրակարգը։
Այդ տեսակետից մասնավորապես արձանագրում ենք հետևյալը․
Կարդացեք նաև
1. Կրավորական կեցվածքով շարունակ բարձրաձայնում են «խաղաղության դարաշրջանի» պարտվողական դրույթը, այն դեպքում, երբ թուրք-ադրբեջանական կողմը կիրառելով հիբրիդային պատերազմին հատուկ գործիքակազմը, այդ թվում՝ պարբերական ռազմական հարձակումները հնարավորություն է ստանում հաջորդաբար հասնել իր նախանշած նպատակներին։
2. Հնչեցնում են կեղծ ու սին պնդումներ առ այն, թե աշխարհաքաղաքական կենտրոնների և միջազգային հանրության դիրքորոշումները հակադիր են Հայության ազգային ու պետական շահերին, և նմանատիպ թեզերով նպատակ են հետապնդում վերջնականապես ընկճել մեզ ու տրամադրել ինքնիշխանության և ինքնության հետ կապված ցանկացած անդառնալի զիջումների։
3. Հայության թշնամիների հետ հարաբերություններում մեր ազգային ու պետական շահերը դարձնում են սակարկման առարկա, ճանաչում և արձանագրում են հայկական ազգային տարածքների վերամիավորման համար մղած պայքարի վերջնական պարտությունը, ու այդ կերպ փաստորեն փակում են մեր կենսական հիմնախնդիրների լուծման հնարավորությունները։
4. Առանց Հայկական հարցը ներկայացնող համարժեք օրակարգի հետևում են Թուրքիայի հետ առանց նախապայմանների հարաբերությունների կարգավորման անհեռանկար դիրքորոշմանը, ինչին հակառակ՝ թուրք-ադրբեջանական տանդեմը շարունակում է հանդես գալ համադրված կայուն մոտեցումներով ու պահանջներով և գործել միայն իրենց ընդհանրական շահերի թելադրանքով։
Ելնելով ստեղծված իրադրությունից վերահաստատում և հայտնում ենք հետևյալ առաջնահերթությունները.
Ա) Ազգային-ազատագրական պայքարի միջոցով իշխանազրկել Փաշինյանին ու իր վարչախմբին, և բացառել երկիրը տիրող հակահայ իշխանական համակարգի վերարտադրությունը՝ գործողը օտարի հերթական կամակատար վարչախմբով փոխարինելու միջոցով:
Բ) Ապօրինի հայտարարել 1921 թվականի Մոսկվայի և Կարսի պայմանագրերը, 2020 ու 2021 թվականների երեք եռակողմ կապիտուլյացիոն հայտարարությունները, և հետևողական անհաշտ պայքար մղել առաջացած հետևանքները առավելագույնս վերացնելու նպատակով։
Գ) Հռչակել, որ Արցախի ազատագրման վերջնանպատակը վերամիավորումն է Հայաստանի հետ, և միակամորեն հայտարարել մինչև 2020 թվականի սեպտեմբերի 27-ը եղած սահմանները վերականգնելու նպատակի մասին։
Հաշվի առնելով վերոգրյալը, «Ազգային օրակարգ» կուսակցությունը կրկին վերահաստատում է իր հանձնառությունը ազգային-ազատագրական պայքարի միջոցով ձերբազատվել Փաշինյանից և իր վարչախմբից՝ համախմբվելով ազգայնական իշխանությամբ Ազգային պետություն ձևավորելու կենսական նպատակի շուրջ։
