Ադրբեջանի ԱԳՆ խոսնակ Լեյլա Աբդուլլաևան հայտարարել է, թե Հայաստանի վարչապետի «անհիմն» մեղադրանքները «կասկածի տակ են դնում այդ երկրի` խաղաղության ձգտումները»:
«Նիդերլանդների Քլինգենդայլի միջազգային հարաբերությունների ինստիտուտում Հայաստանի վարչապետի անհիմն մեղադրանքներն Ադրբեջանի նկատմամբ, այդ թվում մեղադրանքները մարդասիրական հարցերում, վկայում են այն մասին, որ Հայաստանի ղեկավարության դիրքորոշումը երկու երկրների միջև հարաբերությունների կարգավորման հարցում հեռու է անկեղծությունից»:
Լեյլա Աբդուլլաևան նշել է, որ եռակողմ համաձայնագրի ստորագրումից, ու նաև երկու ղեկավարների բրյուսելյան հանդիպումից հետո էլ ականների պայթյունից զոհվել է 219 մարդ, հիմնականում քաղաքացիական անձիք: Ընդ որում, նրա խոսքով, անգամ Հայաստանի կողմից ականապատ դաշտերի քարտեզները փոխանցելուց հետո նման միջադեպերը շարունակվում են, և միայն ապրիլին նման 9 միջադեպերի հետևանքով վիրավորում է ստացել 10 մարդ:
«Նման հանգամանքներում Հայաստանի վարչապետի մեղադրանքները, թե Ադրբեջանը մարդասիրական քայլեր չի ձեռնարկում, չի վերադարձնում հայկական ծագմամբ պահվող անձանց, անտեղի են և անհիմն»,- ասել է Ադրբեջանի ԱԳՆ խոսնակը:
Կարդացեք նաև
Նա հավաստիացրել է, որ մարդասիրական հարցերը խաղաղության օրակարգի կարևոր բաղադրիչն են, և հենց այդ պատճառով էլ Ադրբեջանի միշտ իր գործունեության մեջ առաջնորդվում է մարդասիրական սկզբունքներով, «միակողմանի կերպով ձեռնարկել է մարդասիրական քայլեր 44-օրյա պատերազմի ժամանակ և հետպատերազմական շրջանում էլ»:
«Սակայն հայկական կողմը պետք է ի վերջո հասկանա, որ խաղաղության համար պետք է ոչ միայն խոսել, այլև գործել: Բայց այն, որ Հայաստանի վարչապետը նախկինի պես շարունակում է հանդես գալ Ադրբեջանի հասցեին անհիմն մեղադրանքներով, լրջորեն կասկածի տակ է դնում այդ երկրի՝ հանուն խաղաղության գործելու ցանկությունը»,- ասել է Լեյլա Աբդուլլաևան:
Պատրաստեց Վիկտորյա ԱՆԴՐԵԱՍՅԱՆԸ
