Քաղաքագետ Ստեփան Դանիելյանը մայիսի 11-ին «Հայկական օրակարգ. իրավիճակ եւ հանգուցալուծում» թեմայով քննարկմանը նշեց, որ իշխանության ադեկվատությունը չի երեւում դեռ 2018 թվականից, ինչը բերեց պարտերազմի: Նա դժվարացավ գնահատել, թե դա տգիտությա՞ն, հոգեւոր շեղումի՞, արդյունք էր, թե՞ ծրագիր, որն իրականացնում է Նիկոլ Փաշինյանը: Բայց ասաց, որ այդ քայլերը շարունակվում են:
Քաղաքագետը վերլուծել է միջազգային հանրության պահանջը, որպեսզի Հայաստանն ու Ադրբեջանը որոշակի պայմանավորվածություն ձեռք բերեն, սահմանազատման ու սահմանագծման ուղղությամբ կոնկրետ քայլեր կատարեն, ու եզրահանգել է, որ Արեւմուտքի ծրագիրն Արցախի հարցի վերջնական լուծումն է՝ տարածաշրջանից Ռուսաստանի դուրս մղելու հեռանկարով, Ռուսաստանին պետք է, որ հակամարտությունը բաց մնա, որպեսզի Հայաստանում եւ Արցախում զորք ունենա եւ իր ազդեցությունը պահպանի Հարավային Կովկասում, իսկ Ադրբեջանը իր բոլոր պահանջները կատարում է Թուրքիայի եւ այլ երկրների աջակցությամբ:
Այս համատեքստում անդրադառնալով ընդդիմությանը, քաղաքագետը ցանկանում է, որպեսզի վերջինը հստակ ասի, թե ինչ խնդիր է ուզում լուծել: Առաջին տարբերակով ցանկանում է խանգարել խաղաղության պայմանագրի ստորագրմանը, երկրորդով՝ իշխանափոխության միջոցով ժամանակ ձգձգել՝ սպասելով Ռուսաստան-Ուկրաինա հակամարտության հանգուցալուծմանը: Եվ երրորդով ասում է, որ ինքը իշխանության գալու դեպքում Վերին Շորժան, Սեւ լիճը չի տալու Ադրբեջանին եւ Արցախն էլ չի ճանաչելու Ադրբեջանի կազմում: Ընդ որում, իշխանությունը վերցնելով՝ ընդդիմությունը պետք է պատասխանատվություն ստանձնի:
Ստեփան Դանիելյանն ընդդիմությանը քննադատեց նաեւ նրա համար, որ մինչեւ հիմա հանրահավաքների հարթակից քաղաքական ելույթ չի հնչել, ինչը կարող էր հանրության վերաբերմունքը փոխել:
Կարդացեք նաև
Աշոտ ՀԱԿՈԲՅԱՆ
