«Հայկական օրակարգ. իրավիճակ եւ հանգուցալուծում» թեմայով այսօրվա քննարկման ժամանակ քաղաքական գործիչ Արման Աբովյանը նշեց, որ իշխանությունը ընդդիմության գործողություններով փորձում է վախեցնել հանրությանը, թե նրանց գործողությունների հետեւանքով թշնամին կարող է նորից հարձակվել եւ դա գնահատեց որպես մանիպուլյացիա:
«Մենք խնդիր ունենք ներկայացնել խնդիրը հասկանալի բառերով, ինչը հետեւյալն է. բոլոր գործընթացները, որոնք խաղաղության դարաշրջան գեղեցիկ բառերի ներքո մատուցվում են, դա նշանակում է մի բան՝ Հայաստանի Հանրապետության մասնատում: Մենք չպետք է վախենանք այդ բառերն արտաբերելուց: Այլ կերպ հնարավոր չէ ձեւակերպել Հայաստանի Հանրապետության ինքնիշխան տարածքների շուրջ գործընթացները, որոնք, ցավոք, մենք լսում ենք թշնամի պետություններից»,-ասաց նա:
Խոսելով այն տեսանկյունի մասին, որ երկրի ներսում տիրող իրավիճակը լուծելու համար պետք է վստահություն ներշնչող մարդիկ միջնորդի դեր ստանձնեն եւ դա կարող էր լինել ՀՀ նախագահը, եթե նա իսկապես վստահություն ունենար, Արման Աբովյանն ասաց. «Միջնորդը հարցը լուծողը չէ: Նա պետք է լինի մարդ, ում բոլորը հավատում են, ով վստահություն է ներշնչում բոլորին: Խոսքը հասարակություն եւ հակամարտող կողմերի՝ ընդդիմության եւ իշխանության մասին է: Միջնորդի հիմնական խնդիրն այն է, որ հանգուցալուծման անարյուն եզրերը գտնի, որպեսզի թուրքն ու ադրբեջանցին ստեղծված իրավիճակը չօգտագործեն: Դա կարող է լինել մեկ մարդ, կարող է լինել քաղաքական միավոր»:
Աշոտ ՀԱԿՈԲՅԱՆ
