Այսօր ժամը 15։00–ին, Արարատ համայնքում նախատեսված էր ավագանու նիստ, սակայն հերթական նիստն այդպես էլ չկայացավ՝ քվորում չլինելու պատճառով:
Օրակարգում ընդգրկված էր 14 հարց, որոնց մեծ մասը համայնքի սեփականություն հանդիսացող հողատարածքների ուղղակի վաճառքի կարգով օտարելու թույլտվության հարցն էր: Մեկ հարց էլ առնչվում էր Արարատ համայնքի 2022 թվականի բյուջեի եկամտային եւ ծախսային մասերի հոդվածներում փոփոխություն կատարելուն: Համայնքապետարանի աշխատակազմից Aravot.am-ի հարցին ի պատասխան հայտնեցին, որ որեւէ խնդիր կամ տարաձայնություն չկա ավագանու անդամների հետ կապված, եւ որ ավագանու նիստի մասին բոլոր անդամները պատշաճ ծանուցված են եղել: Իսկ թե ինչու քվորում չեն ապահովել՝ աշխատակազմում տեղյակ չէին: Հաջորդ նիստի օրը նույնպես հայտնի չէր, դեռ չէին որոշել:
Հիշեցնենք, որ Արարատ համայնքում կա ավագանու 33 անդամ: Աշխատակազմից նաեւ հայտնեցին, որ, եթե անգամ մեկ ձայն էլ պակասի քվորումի համար, նիստը չի կայանում:
Լուսինե ԲՈՒԴԱՂՅԱՆ
