Քաղաքական գործիչ Նարինե Դիլբարյանը «Հայելի» ակումբում անդրադարձավ Հայաստանին եւ Արցախին սպառնացող վտանգներին, ստեղծված ճգնաժամային իրավիճակին եւ դրանից դուրս գալու համար սկսված պայքարին:
Նա նշեց, որ յուրաքանչյուր պայքար պետք է ունենա ոչ միայն իր դրդապատճառները, հիմնանպատակը, այլ նաեւ տեխնոլոգիան, որը կարեւոր է: «Այսօր շատերը խոսում են այն մասին, եւ անգամ հանրահավաքում առաջնորդներն են նշում, որ մարդկանց մի մասն անտարբեր է եւ դուրս չի գալիս, որովհետեւ վախեր, կասկածներ ունի: Ես ավելի շուտ կասեի, որ հանրության մի մասը, մտածող հատվածը, ուզում է հասկանալ, թե մի ձախողված փորձից հետո կարելի՞ է վերստին դուրս գալ այս իրավիճակից, եւ իրեն կրկին խաբված զգալու մտավախություն ունի:
Բայց անցյալում հաջողված պայքարի փորձ ունենք: Դա Ղարաբաղյան շարժումն է, երբ իշխանությունը դիմում է ռեպրեսիվ մեթոդների՝ խուզարկություններ է սկսում, քրեական գործեր է ուզում հարուցել: Հիմա նաեւ մի նողկալի միտք են շրջանառում, իբրեւ մարդիկ փողով են գալիս: Դրանք լրատվական հնարքներ եւ քարոզչական փորձեր են: Մեր անցած ճանապարհը ցույց է տալիս, որ եթե դու ձերբակալում ես մեկին կամ սկսում ես ռեպրեսիաներ, բնագիտության օրինաչափությունն է աշխատում. զսպանակը ինչքան շատ ես սեղմում, այնքան մեծանում է նրա վեր բարձրանալու ուժը:
Հիմա մենք առաջարկում ենք ձեւավորել իսկապես կոալիցիոն կառավարություն եւ հրամայականը վարչապետի հրաժարականն է ու կառավարության փոփոխությունը: Վարչապետի հրաժարականը պետք է պարտադրվի, քանի որ, միտքս այսպես ձեւակերպեմ. ներքեւներում այլեւս չեն ուզում ունենալ այդպիսի կառավարիչ, որովհետեւ իրոք Հայաստանի անվտանգային եւ տնտեսական, քաղաքական համակարգը ճնշված է: Այն կուսակցությունները, որոնք ունեն սկզբունքային դիրքորոշում հայոց երկու պետականությունների՝ Արցախի եւ Հայաստանի ինքնիշխանության եւ անվտանգության վերաբերյալ, նրանք պետք է ձեւավորեն կոալիցիա՝ ներառելով, իհարկե, Ազգային ժողովում ներկայացված «Քաղաքացիական պայմանագիրը», որը այդուհանդերձ հավաքել է ինչ-որ ձայներ: Ներսում թշնամիներ ունենալը, թշնամիներ ստեղծելը նույնքան վտանգավոր է, որքան կուռքեր ստեղծելը,-ասաց Նարինե Դիլբարյանը:
Կարդացեք նաև
Աշոտ ՀԱԿՈԲՅԱՆ
