Երևան քաղաքի ընդհանուր իրավասության դատարանում՝ դատավոր Աննա Դանիբեկյանի նախագահությամբ ընթացող ՀՀ երկրորդ նախագահ Ռոբերտ Քոչարյանի և Արմեն Գևորգյանի գործով դատական նիստից առաջ Ռոբերտ Քոչարյանի պաշտպանները ներկայացրել էին նրա խափանման միջոցը փոխելու վերաբերյալ, Արմեն Գևորգյանին ՀՀ-ից ժամանակավորապես բացակայելու թույլտվության, ինչպես նաև նախնական քննության ընթացքում քննիչ Մուշեղյանի կողմից հավաքված ապացույցներն անթույլատրելի ճանաչելու մասին միջնորդություններ;
Սակայն մեղադրող դատախազներն առաջարկեցին նիստը շարունակել, ուսումնասիրել ապացույցներն, այնուհետև քննարկել միջնորդությունները:
Ռոբերտ Քոչարյանի պաշտպան Հայկ Ալումյանն այս առիթով ասաց. «Եթե կա ապացույցի թուլատրելիության հետ կապված խնդիր, դա նշանակում է, որ այն՝ որպես ֆիզիկական մի բան գոյություն ունի, բայց իրավական առումով չկա, ուստի մենք առարկում ենք դատարանի գործողությունների դեմ»:
Արմեն Գևորգյանի պաշտպան Լուսինե Սահակյանը հինգ րոպե ընդմիջում խնդրեց: Մեղադրող դատախազներն ասացին, որ այսպիսով պաշտպանները խոչընդոտում են ապացույցների հետազոտմանը: Լուսինե Սահակյանը պնդեց՝ խափանման միջոցի հարցերը չեն կարող չքննարկվել անհապաղ, ինչպես նաև ԵԽԽՎ պատգամավորի անձեռնմխելիության պայմանները: Լուսինե Սահակյանը վրդովվեց, թե ինչու են դատախազներն առաջ անցնում, չէ՞ որ գոյություն ունի միջազգային պարտավորություն, Սահմանադրություն: Նաև ասաց, որ ընդմիջում չտրամադրելով՝ իր ու իր պաշտպանյալի իրավունքներն են խախտվում: Դատարանը հորդորեց տեղում խորհրդակցել: Լուսինե Սահակյանն ասաց՝ իր պաշտպանյալի հետ դուրս է գալիս: Աննա Դանիբեկյանն էլ ասաց՝ եթե դուրս գան, նիստը կհետաձգի ու միջնորդությունը չի քննարկի: Սա Լուսինե Սահակյանը բնութագրեց որպես շանտաժ:
Կարդացեք նաև
Հայկ Ալումյանն էլ հարցրեց՝ ի՞նչ խնդիր կա հինգ րոպե ընդմիջում տալու մեջ, թե՞ դատախազներն են վետո դրել: Ի վերջո` պաշտպանները դահլիճը լքեցին: Միջամտեց Ռոբերտ Քոչարյանն ու, դիմելով դատավորին, ասաց. «Անիմաստ լարվածություն եք ստեղծում»: Աննա Դանիբեկյանը պատասխանեց՝ դուք ու ձեր պաշտպաններն եք ստեղծում: Ռոբերտ Քոչարյանն էլ հարցրեց՝ էդ հինգ րոպեն որոշի՞չ էր, ես չեմ հասկանում: Մեղադրող դատախազ Գևորգ Բաղդասարյանն էլ հայտարարեց. «Պաշտպանական կողմի գործողություններն ուղղված էին հիմք ստեղծելուն՝ դատական նիստերի դահլիճից հեռանալու համար: Բոլոր գործողությունները ունեին նպատակ, որ բացառեին, որ ապացույցները հետազոտվեն»:
Արմեն Գևորգյանը պնդեց, որ չքննարկելով իր՝ Հայաստանից բացակայելու թույլտվության միջնորդությունը, խախտվում են իր իրավունքները: Աննա Դանիբեկյանն ի պատասխան ասաց՝ այդ հարցերը կքննարկվեն, երբ անցնեն իր միջնորդությանը:
Երբ դատախազների ներկայացմամբ պատրաստվում էր ապացույցներ հետազոտել, Հայկ Ալումյանը վերադարձավ դատական նիստերի դահլիճ ու միջնորդեց նիստը դռնփակ անցկացնել, եթե պետք է հետազոտվի այդ ապացույցը:
Դատավորը հայտարարեց, որ միջնորդության հետ կապված որոշումը կկայացնի դռնփակ:
Հիշեցնենք՝ Ռոբերտ Քոչարյանը մեղադրվում է ՀՀ քրեական օրենսգրքի 300.1-րդ հոդվածի 1-ին մասով և 311-րդ հոդվածի 4-րդ մասի 2-րդ կետով` ՀՀ սահմանադրական կարգը տապալելու և առանձնապես խոշոր չափերով կաշառք ստանալու մեջ: Արմեն Գևորգյանը մեղադրվում է ՀՀ քրեական օրենսգրքի 38-300.1-րդ հոդվածի 1-ին մասով, 311-րդ հոդվածի 4-րդ մասի 2-րդ կետով և 190-րդ հոդվածի 3-րդ մասի 1-ին կետով` ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ:
Տաթև ՀԱՐՈՒԹՅՈՒՆՅԱՆ
