Հավաքներին մասնակցելու նպատակով այլ անձանց նյութապես շահագրգռելու համար կալանավորված Արմավիրի երկու բնակիչների պաշտպան Մխիթար Տիգրանյանը պաշտպանյալների կալանքն ու առաջադրված մեղադրանքը հիմնավոր չի համարում:
«Ըստ այդմ՝ բողոք է ներկայացվելու Վերաքննիչ քրեական դատարան, մնացածը քրեական գործով կպարզվի»,-Aravot.am-ին ասաց փաստաբանը:
Նրա խոսքով՝ իրենք դեռ չգիտեն հարուցված քրեական գործում համացանցում տարածված ձայնագրությո՞ւնն է որպես մեղադրանքի հիմք ընդունվել, թե՞ այլ ապացույց. «Համացանցում տարածված է, բայց մենք չգիտենք ՝ քրեական վարույթում այդ ձայնագրությո՞ւնն է, թե՞՝ այլ: Մեզ դեռ չեն ներկայացրել, որ մենք ասենք՝ մե՞նք ենք, թե՞ չէ»:
Փաստաբանն ասաց՝ պաշտպանյալների հետ չի քննարկել տարածված ձայնագրությունը, դիրքորոշում չեն հայտնել՝ իրե՞նք են նշված ձայնագրությունում խոսում, թե՞ ոչ, եթե այո, ապա փողային ինչ հարցեր են քննարկում. «Քրեական վարույթի շրջանակներում մեղադրանք է առաջադրված, մենք ասում ենք՝ այդ արարքը չենք արել; Ինչ վերաբերում է համացանցում տարածվածին, երբ քննիչը մեզ կհարցնի՝ այ էս ձայնագրությունն է, լսեք, ասեք՝ դուք եք, թե չէ, այդ հարցին պաշտպանյալը կպատասխանի»:
Կարդացեք նաև
Իսկ մինչ պաշտպանյալների հետ կատարվածը քննարկելը, փաստաբանը ձայնագրությունը լսել ու եզրահանգել է. «Տարածված ձայնագրությունը, որը շատ է համացանցում շրջանառվում, ասում է ՝ «Բաղրամյանն էլ հետը՝ 200»: Այսինքն՝ ՀՅԴ-ն կառույցներ ունի տարբեր քաղաքներում, բնակավայրերում, գրասենյակային գործունեության ծախսեր ավելի շատ կարելի է մեկնաբանել, քան ինչ-որ անձանց շահագրգռել: Բաղրամյան 200 ասելով՝ ես հասկանում եմ, որ Բաղրամյան բնակավայրն է, այդտեղ էլ կառույցներ ունեն. կոմունալ ծախսեր, այդտեղի կուսակիցների հետ հանրահավաքին ներկայանալու ընթացիկ ծախսեր, բայց այդտեղ ուրիշ ոչ մի խոսք չկա»:
Արփինե ՍԻՄՈՆՅԱՆ
