ԱՄՆ Գլենդել եւ Լոս Անջելես քաղաքներում Հայաստանի հյուպատոսարանների դիմաց այսօր տեղի հայերը ՀՀ վարչապետ Նիկոլ Փաշինյանի հրաժարականի պահանջով բողոքի ցույցեր են կազմակերպել։ Արցախի դրոշներով, «զարթիր լաո» կարգախոսով եւ «առանց Նիկոլ Հայաստան» վանկարկումներով երթ է իրականացվել դեպի հյուպատոսարաններ։ Ցուցարարները հայտարարեցին, որ հայրենիքը տագնապալի օրեր է ապրում, եւ իրենք, որպես սփյուռք, պարտավոր են կեցվածքը հստակեցնել եւ ձայնը լսելի դարձնել ՀՀ-ի եւ Արցախի հայրենակիցներին։
«Նրանք պայքարում են նաեւ մեր համար եւ մեր փոխարեն։ Արդեն կասկածից վեր է, որ ՀՀ իշխանությունը վարում է պրոթուրքական քաղաքականություն։ Մեր ազգային շահերը զիջելով՝ պատրաստ են բարեկամություն անել այն ցեղի հետ, որը մինչեւ հիմա կալանքի տակ է պահում մեր ռազմագերիներին։ Այն հայը, որը գիտակցում է, որ Արցախը չի կարող լինել Ադրբեջանի կազմում, որ ՀՀ տարածքային ամբողջականությունն անձեռնմխելի է, որ ՀՀ պետականությունն անսակարկելի է, պետք է իջնի փողոց եւ մասնակից դառնա ՀՀ ճակատագրի կերտմանը։ Սա վերաբերում է աշխարհի բոլոր հայերին։ Սա կուսակցական պայքար չէ, հայրենիքը վեր է ամեն ինչից»,-ընթերցվեց հայտարարությունը։
Քաղաքացի Շանթ Նաջարյանը բարձրախոսով հայտարարեց, որ արեւմտյան Ամերիկայից մինչեւ արեւելյան ԱՄՆ ու Կանադա հայությունը ոտքի է կանգնել․ «Նպատակն է՝ ազատագրել ՀՀ-ն ու Արցախը թուրքերից ու թրքանման հայերից, որոնք նստած են ՀՀ իշխանության ղեկին։ Մեր բողոքներով արթնացնենք հայ մարդու տեսակը, հաղթանակած հայի ոգին։ Ոտքի, այլապես կորցնելու ենք մեր նախկին սերունդների ժառանգածը։ Պարտվում են քաղաքական գործիչները, ոչ թե ժողովուրդն ու բանակը։ Իշխանությունը դավաճան է եւ զորավիգ չէ այն հայրենիքին, որը զինվորի արյամբ է լցված»։
Շանթ Նաջարյանը հայրենակիցներին կոչ արեց վերջ տալ սեւի-սպիտակի բաժանումներին․ «Մենք այսօր այստեղ չէինք հավաքվի, եթե վերջին չորս տարում ՀՀ իշխանության քաղաքականությունը միտված լիներ ՀՀ-ի եւ Արցախի շահերին։ Մենք գլուխ չենք ծռել եւ չենք ծռելու ոչ Նիկոլի, ոչ թուրքի, ոչ ադրբեջանցու առաջ։ Ոչ էլ որոշ սուտ խմբերի առաջ, որոնք հայրենասիրական կոչերով փորձում են իշխանության գալ եւ վաճառել հայրենիքը»։
Կարդացեք նաև
Քաղաքացի Վռամ Մարտիրոսյանն էլ հայտարարեց՝ ՀՀ իշխանությունը չորս տարի չկատարեց խոստումները, ծախեց հայրենիքը․ «Դժբախտն ու դժգույնը Նիկոլն է, ոչ թե Շուշին։ Նա չորս տարի վարել է հակահայկական, թուրքամետ քաղաքականություն ու խաբել ժողովրդին։ Զարմանո՞ւմ եմ՝ ինչո՞ւ մարդիկ ոտքի չեն կանգնում հայրենիքի փրկության համար։ Նա տվեց Արցախը, ու իր համար դա նորմալ էր, Հայաստանից մաս-մաս տալիս է, նորմալ է, պետք է տա, պրծնի, նոր մարդիկ ոտքի կանգնե՞ն, նախկին հայրենիքի համա՞ր ոտքի կանգնեն։ Եթե այսօր ոտքի չկանգնենք, կորցնելու ենք ողջ Հայաստանը»։
Լուիզա ՍՈՒՔԻԱՍՅԱՆ
