«Միութենական պետության մասին խոսակցություններն իրակա՞ն են։ Արդյոք այս ամենը նրա համար չէ՞, որ Արցախը մտնի ՌԴ կազմ։ Խոսակցություններ կան, որ Արցախի ժողովուրդն էլ է համաձայն»,- Ֆրանսիայի հրապարակում այսօր «Հայկական նախագիծ» գիտակրթական հ/կ-ի հերթական բացօթյա քննարկման ժամանակ նման հարց հղեց քաղաքացիներից մեկը։
Մերձավորարեւելյան տարածաշրջանի հարցերով փորձագետ, պատմաբան Սերգեյ Մելքոնյանը պատասխանեց․ «Արցախի պաշտպանության բանակն այսօր, ցավոք, չի կարող դիմադրել առկա սպառնալիքներին։ Ինչո՞ւ, որովհետեւ ՀՀ-ն Արցախի թիկունքին չէ, որովհետեւ պաշտոնական Երեւանը Մոսկվայում եւ Բրյուսելում ասում է, թե Արցախը մեր խնդիրը չէ, թե այն մեր գլխացավանքն էր, որից հրաժարվել ենք, թող ռուսներն ադրբեջանցիների հետ հարցը լուծեն»։
Սերգեյ Մելքոնյանի խոսքով․ «ՀՀ իշխանությունը պատրաստ է քննարկել Արցախի կարգավիճակն Ադրբեջանի կազմում, իսկ դա նշանակում է, որ հրաժարվում է Արցախից։ Այն ժամանակ, երբ Երեւանը կլինի թիկունքում, Արցախի ժողովուրդը կտեսնի, որ ոչ միայն ՌԴ խաղաղապահները կարող են աջակցել իր անվտանգության ապահովմանը, այլեւ ՀՀ-ն եւ վերջինիս միջոցով նաեւ սփյուռքը։ Մինչդեռ այս իշխանությունը պատրաստ չէ աջակցելու։ Մի քանի միլիոն է միայն ուղարկում, որ բնակարաններ կառուցվեն փախստականների համար։ Գլխավորն անվտանգության հարցն է, իսկ ՀՀ իշխանությունը պատրաստ չէ կանգնել Արցախի թիկունքում»։
Լուիզա ՍՈՒՔԻԱՍՅԱՆ
